‘महावारस’ पुरस्कार गिर्यारोहण महासंघाला
महाराष्ट्र राज्य मराठी चित्रपट पुरस्कार सोहळ्यात मुख्यमंत्र्यांच्या हस्ते गौरविले
महाड, ता. ६ (बातमीदार) : अखिल महाराष्ट्र गिर्यारोहण महासंघाला पहिला छत्रपती शिवाजी महाराज महावारस पुरस्कार २०२५ प्रदान करण्यात आला. महासंघाचे सचिव डॉक्टर राहुल वारंगे यांनी ही माहिती दिली.
मुख्यमंत्री देवेंद्र फडणवीस यांच्या हस्ते देण्यात आलेला हा पुरस्कार महासंघाच्या वतीने अध्यक्ष ज्येष्ठ गिर्यारोहक उमेश झिरपे, कार्याध्यक्ष हषीकेश यादव आणि माधव फडके यांनी स्वीकारला. मुंबई येथे पार पडलेल्या महाराष्ट्र राज्य मराठी चित्रपट पुरस्कार या सोहळ्यामध्ये महासंघाला गौरवण्यात आले. याप्रसंगी मुख्यमंत्री देवेंद्र फडणवीस, सांस्कृतिक कार्य मंत्री आशिष शेलार, मंत्री मंगलप्रभात लोढा, अप्पर मुख्य सचिव विकास खारगे सांस्कृतिक कार्य सचिव किरण कुलकर्णी, पुरातत्व विभागाचे संचालक तेजस गर्गे उपस्थित होते.
युनेस्कोच्या जागतिक वारसा स्थळ यादीमध्ये छत्रपती शिवाजी महाराजांचे महाराष्ट्रातील ११ व तामिळनाडू येथील एक असे एकूण १२ किल्ले समाविष्ट होण्याच्या प्रक्रियेत अखिल महाराष्ट्र गिर्यारोहण महासंघाने या टू द स्केल मॉडेल (प्रतिकृती) तयार केले होते. या १२ प्रतिकृतींपैकी दोन प्रतिकृती सांगली येथे तर १० प्रतिकृती मुंबई येथे विक्रमी वेळेत म्हणजेच अडीच महिन्यात तयार करण्यात आल्या असून याकरिता महासंघाच्या सदस्यांनी प्रत्यक्ष किल्ल्यांवर जाऊन तिथल्या वास्तूंची मोजमापे घेतली व त्यानुसार त्यांचे प्रमाण ठरवण्यात आले. महासंघाने अनेक किल्ल्यांवर स्वच्छता मोहिमही राबविल्या आहेत. याबद्दल हा पहिला छत्रपती शिवाजी महाराज महावारस पुरस्कार महासंघाला प्रदान करण्यात आला आहे. सन्मानचिन्ह, सन्मानपत्र व सन्मानार्थ तीन लाख रुपयांचा धनादेश असे या पुरस्काराचे स्वरुप आहे.
महाराष्ट्रातील सर्व शिवप्रेमी, दुर्गप्रेमी गिर्यारोहक स्वयंसेवकांच्या कार्याचा गौरव या निमित्ताने झाला व हा पुरस्कार गडकोटांसाठी आणि त्यांच्या संवर्धनासाठी काम करणाऱ्या सर्व संस्था व दुर्गप्रेमींचा आहे, अशी भावना महासंघाचे अध्यक्ष उमेश झिरपे यांनी व्यक्त केली.

युनेस्कोकडूनही कौतुक
प्रतिकृती मागील वर्षी दिल्ली येथे भारत मंडपममध्ये पार पडलेल्या सांस्कृतिक प्रदर्शनामध्ये प्रदर्शित केल्या गेल्या. यावेळी वेगवेगळ्या देशांमधील सदस्यांनी या प्रतिकृतींचे कौतुक केले. याचसोबत युनेस्कोचे आलेले शिष्टमंडळही अत्यंत प्रभावित झाले होते

फोटो -
महाड ः मुख्यमंत्र्यांच्या हस्ते महासंघाच्या पदाधिकाऱ्यांनी पुरस्कार स्वीकारला.