रायगडवरील पायरी मार्गाचा काही भाग कोसळला
महाड, ता. ८ (बातमीदार) : रायगड किल्ल्यावरील पायरी मार्गाचा महादरवाजाजवळील काही दगडी भाग कोसळल्याची घटना गुरुवारी (ता. ७) सायंकाळी घडली. त्यामुळे हा मार्ग पर्यटकांसाठी धोक्याचा झाला असून, सध्या या ठिकाणी तात्पुरते रेलिंग टाकण्यात आले आहे.
रायगडावरील पायरी मार्गाने हजारो पर्यटक गडावरती ये-जा करतात. येथील महादरवाजा येथील काही भाग गुरुवारी सायंकाळी कोसळला, परंतु ही घटना घडली त्या वेळी या मार्गावर वर्दळ नव्हती. या घटनेमुळे हा मार्ग पर्यटकांसाठी दोन दिवस बंद ठेवण्यात आला आहे. रायगड प्राधिकरणाच्या वतीने या ठिकाणी तात्पुरते रेलिंग तयार करण्यात आले असून, हा मार्ग सुरक्षित करण्याचा प्रयत्न केला आहे. परंतु गडावर पावसाचा जोर असल्याने येणाऱ्या काळात हा पायी मार्ग धोकादायक ठरण्याची शक्यता वर्तवली जात आहे. दरम्‍यान, जिल्हाधिकारी यांनी यापूर्वी ३१ ऑगस्टपर्यंत रायगड किल्ल्याचा पायरी मार्ग बंद करण्याचे आदेश दिले होते, परंतु पावसाळ्यात गडावरील पर्यटन बंद झाल्यास या ठिकाणी असणाऱ्या व्यावसायिकांची व विक्रेत्यांची उपासमारीची वेळ येऊ शकते; त्यामुळे व्यावसायिकांच्या मागणीवरून पायरी मार्गावरील बंदी उठवण्यात आली आहे.