टीबी रुग्णालयातर्फे क्षयरुग्णांना
घरगुती पौष्टिक आहार

सकाळ वृत्तसेवा
मुंबई, ता. २६ : क्षयग्रस्त रुग्णाला पौष्टिक आहार फार गरजेचा असतो; परंतु अनेकदा तो गरीब-गरजूंच्या आवाक्यात नसतो. जागतिक क्षयरोग दिनाचे औचित्य साधून शिवडीतील टीबी रुग्णालयातील अधिकारी-कर्मचाऱ्यांनी रुग्णांना स्वस्त आणि पौष्टिक आहाराचे वाटप करून त्यांच्या चेहऱ्यावर हास्य फुलवले.
क्षय रुग्णालयात दाखल होणाऱ्या रुग्णांमध्ये गरिबांची संख्या मोठी आहे. त्यांना आजारपणात आवश्यक असा सकस आहार घेता येत नाही. अशा रुग्णांना स्वस्त आणि मस्त सकस आहाराचे वाटप करण्यात आले. डॉक्टर-परिचारिकांसह रुग्णालयातील कर्मचाऱ्यांनी त्यात सहभाग घेतला. चविष्ट प्रथिनेयुक्त पौष्टिक अन्नासह क्षयरोगावर अत्यंत उपयुक्त असे अन्नपदार्थ रुग्णांना देण्यात आले. मसूर डाळीपासून बनवलेली प्रोटीन पावडर रुग्णांना देण्यात आली. दालचिनीसह मसूर आणि शेंगदाणे भाजून त्याची प्रथिने पावडर बनवण्याबाबत मार्गदर्शन करण्यात आले. कर्मचाऱ्यांनी स्वत: पदार्थ बनवले होते.
क्षयग्रस्त गरीब रुग्णांना पौष्टिक आहार घेणे परवडत नाही. एका प्रोटीन पाकिटाची किंमत किमान ७०० रुपये आहे. ती फक्त महिनाभर टिकते. घरगुती पदार्थ बनवायला सोपे असून बजेटमध्ये आहेत; परंतु बऱ्याच जणांना त्याची माहिती नसते. म्हणून आम्ही पाककृती छापून ओपीडीमध्ये येणाऱ्या रुग्णांना आणि डिस्चार्ज मिळालेल्यांना वितरित करण्याचा विचार करत आहोत, असे रुग्णालयातील एका अधिकाऱ्याने सांगितले.
........