एमएच-सीईटीची परीक्षा राज्यभरात सुरळीत सुरू
मुंबई, ता. ९ : राज्यातील सरकारी, अनुदानित आणि विविध व्यवस्थापनांच्या माध्यमातून चालविल्या जाणाऱ्या खासगी महाविद्यालयातील अभियांत्रिकी, वैद्यकीय, औषधनिर्माण शास्त्र, कृषी आदी व्यावसायिक अभ्यासक्रमांच्या प्रवेशासाठीच्या एमएचटी सीईटीला आज राज्यभरात सुरळीत सुरुवात झाली. १३ मेपर्यंत परीक्षा चालणार आहे. राज्यातील मुख्य शहरांपासून जिल्ह्यातील १९६ केंद्रांवर विविध सत्रांत परीक्षा घेतली जात असल्याचेही सांगण्यात आले.
आज सुरू झालेल्या एमएचटी सीईटी परीक्षेत काही अपवाद वगळता कोणत्याही केंद्रांवर विद्यार्थ्यांना अडचणी आल्या नसल्याचे सीईटी सेलकडून सांगण्यात आले. परीक्षेसाठी यंदा सहा लाख १९ हजार ३३ विद्यार्थी बसले आहेत. त्यात पीसीएम ग्रुपसाठी नोंदणी करण्यात आलेल्या विद्यार्थ्यांची परीक्षा ९ मेपासून सुरू झाली आहे. पीसीबी ग्रुपची परीक्षा १५ मेपासून सुरू होणार असून २० मे रोजी संपणार आहे. राज्याबाहेरील १५ केंद्रांवर परीक्षा सुरू झाली आहे. पाच दिवस चालणारी परीक्षा विविध सत्रांत ऑनलाईन पद्धतीने घेतली जात आहे.