सकाळ वृत्तसेवा
मुंबई, ता. २८ ः अवकाळी पाऊस आणि वाऱ्याची वाढलेली गती यामुळे मुंबईतील प्रदूषण कमी झाले आहे. मुंबईत सलग चौथ्या दिवशीही पावसाची शक्यता हवामान विभागाने वर्तवली आहे. त्यामुळे प्रदूषणाची पातळी नियंत्रणात राहण्यास मदत मिळणार आहे.
मुंबईत पावसाळी वातावरण अद्याप कायम आहे. भारतीय हवामान विभागाने, बुधवारी अंशतः ढगाळ आकाश राहणार असून मेघगर्जनेसह पाऊस पडेल अशी शक्यता वर्तवली आहे. त्यापुढील ४८ तासांसाठी पावसाचा इशारा नसला तरी वातावरण ढगाळ राहील, असा अंदाजही वर्तवण्यात आला आहे. मुंबईतील हवेचा स्तर केवळ ५९ गुणवत्ता निर्देशांकासह समाधानकारक नोंदवण्यात आला आहे. अनेक भागांतील हवेचा स्तर उत्तम नोंदवण्यात आला आहे. यामध्ये वरळी २३, भांडुप ३७, कुलाबा ४७, मालाड ४९ यांचा समावेश आहे. शिवाय अंधेरी ५१, माझगाव ५५, बोरिवली ६७, चेंबूर ७०, बीकेसी १०७ अशी हवा गुणवत्ता निर्देशांकाची नोंद झाली असून या परिसरात हवेचा स्तर समाधानकारक आहे. मुंबईला लागून असलेल्या नवी मुंबईतील हवेचा स्तरही समाधानकारक असून तेथे ८६ हवा गुणवत्ता निर्देशांकाची नोंद झाली आहे.