मुंबईतील हवेची गुणवत्ता पुन्हा खालावली
वांद्रे येथील हवेची गुणवत्ता स्थर ३०० च्या वर
सकाळ वृत्तसेवा
मुंबई, ता. ३१: मुंबईतील हवा महिन्या दीड महिन्याहून अधिक काळ सुधारलेली राहील, अशी स्थिती सध्या दिसून येत नाही. मुंबईचा हवा निर्देशांक मध्यम स्थरावर गेला तरी शहरातील काही परिसरात मात्र हवा निर्देशांक कायम ढासळत राहतो. सोमवारी (ता. ३१) शहराच्या हवेचा गुणवत्ता निर्देशांक १३३ म्हणजे असमाधानकारक स्थितीत होता. वांद्रे येथे प्रदूषणाची पातळी ३०० या वाईट स्थितीत होती.

गेल्या काही दिवसांपासून प्रदूषण पातळीत घट आणि हवेच्या गुणवत्तेत सुधारणा झाल्याने मुंबईकरांना मोठा दिलासा मिळाला होता. मुंबईच्या सरासरी हवेची गुणवत्ता १०० एक्यूआयपेक्षा कमी झाली होती; मात्र सध्या प्रदूषणामुळे गुणवत्ता स्थर असमाधानकारक स्थितीत आहे. वायू प्रदूषणावर लक्ष ठेवणाऱ्या केंद्रीय प्रदूषण नियंत्रण मंडळाच्या समीर ॲपनुसार, वांद्रे येथील खेरवाडी येथे हवेची गुणवत्ता ३०१ एक्यूआय आणि बीकेसी येथे ती २४१ एक्यूआय होती, तर भायखळा येथे हवेची गुणवत्ता १८६ एक्यूआय, चेंबूरमध्ये १८१ एक्यूआय, गोवंडीत १५९ एक्यूआय आणि सायनमध्ये १५४ एक्यूआय नोंदवली गेली, तर दुसरीकडे कुलाबा, विलेपार्ले विमानतळ, शिवडी, पवई, घाटकोपर येथील हवेची गुणवत्ता ५० ते १०० एक्यूआयदरम्यान म्हणजे समाधानकारक स्थितीत होती.

हवेच्या गुणवत्तेबद्दल एन्व्हायरोकॅटलिस्ट्सचे संस्थापक आणि प्रमुख विश्लेषक सुनील दहिया म्हणाले की, उच्च तापमान आणि दीर्घकाळापर्यंत कोरड्या हवामानामुळे धूळ पुन्हा वाढू लागली आहे. ही धूळ इतर प्रदूषण स्रोतांसह एकत्रित झाल्यामुळे कणांच्या पातळीत असमाधानकारक पातळी वाढत आहे.
--

काळजी घ्या :
खराब हवेच्या गुणवत्तेमुळे श्वास घेण्यास त्रास होऊ शकतो आणि फुप्फुस, दमा आणि हृदयरोग असलेल्या लोकांना अधिक अस्वस्थता जाणवू शकते. त्यामुळे काळजी घेण्याचे आवाहन जे. जे. रुग्णालयाचे पल्मोनोलॉजिस्ट डॉ. रोहित हेगडे यांनी केले आहे.