पालिका रुग्णालयांसाठी १,६०० कोटींची औषधे
प्रक्रिया लवकरच सुरू

सकाळ वृत्तसेवा
मुंबई, ता. २ : मुंबई महानगरपालिकेने केईएम, नायर, सायन व कूपर या प्रमुख रुग्णालयांसह उपनगरीय रुग्णालय, विशेष रुग्णालय, प्रसूतिगृहे, आरोग्य केंद्रांसाठी एक हजार ६०० कोटी रुपयांची औषध खरेदी करण्याचा निर्णय घेतला आहे. त्यामुळे रुग्णालयात पुरेसा औषधसाठा उपलब्ध होऊन, सर्वसामान्य रुग्णांचे पैसे वाचणार आहेत. सायन रुग्णालयाच्या वरिष्ठ अधिकाऱ्यांनी सांगितले की, औषध खरेदी प्रक्रिया लवकरच सुरू होईल. दोन महिन्यांत ही प्रक्रिया पूर्ण होऊन औषधे उपलब्ध होतील.
रुग्णालयातील विविध औषधांच्या तुटवड्यामुळे उपचारांसाठी येणाऱ्या सर्वसामान्य रुग्णांना बाहेरून महागडी औषधे खरेदी करावी लागत आहेत. बाहेरून महागडी औषधे खरेदी करावी लागत असल्यामुळे अनेकांना उसने पैसे घ्यावे लागतात. काही सामान्य नागरिक वैद्यकीय उपचारासाठी अक्षरश: कर्जबाजारी होतात. याकडे अनेकदा राजकीय पक्षांसह सामाजिक संस्था व रुग्णांच्या नातेवाइकांनी लक्ष वेधले होते, मात्र रुग्णालयातील औषधाचा तुटवडा ‘जैसे थे’ आहे. आता यासाठीची निविदा प्रक्रिया पूर्ण झाली असून, लवकरच १२ कंपन्यांची औषधांचा पुरवठा करण्यासाठी नियुक्ती करण्यात येणार आहे.
या प्रक्रियेला किमान महिनाभराचा कालावधी लागणार आहे. त्यामुळे गणपतीपूर्वी पालिकेच्या सर्वच रुग्णालयात पुरेसा औषध साठा व अन्य वैद्यकीय साहित्य उपलब्ध होईल, असे पालिकेच्या आरोग्य विभागाकडून सांगण्यात आले. पालिकेच्या वरिष्ठ अधिकाऱ्याने दिलेल्या माहितीनुसार, औषधांचे दरपत्रक एका आठवडाभरात काढले जाईल. दरपत्रक आल्यावर खरेदी प्रक्रिया सुरू होईल.
...
खर्च असा...
टॅबलेट व कॅप्सूल २१३,८६,५०,०००
वैद्यकीय साहित्य १७५,२०,७८,०००
इंजेक्शन व सेरा व्हॅक्सिन ५९३,९०,४८०००
सुया आणि सिरिंज ४७१,६५,००,०००
एक्स-रे फिल्म, केमिकल इसीजी रोल्स ५३,८०,००,०००