सीईटीच्या प्रवेश नोंदणीला मुदतवाढ
विद्यार्थी हितासाठी निर्णय; मंत्री चंद्रकांत पाटील

मुंबई, ता. ८ ः राज्य सामाईक प्रवेश परीक्षा कक्षामार्फत शैक्षणिक वर्ष २०२५-२६ करिता प्रवेश नोंदणीला मुदतवाढ करण्यात आली आहे. बी.ई./बी.टेक आणि एमबीए/एमएमएस यांसारख्या व्यावसायिक अभ्यासक्रमांच्या प्रवेशासाठी तीन दिवस मुदतवाढ तर केंद्रीभूत प्रवेश प्रक्रियेसाठी प्रवेश घेणाऱ्या विद्यार्थ्यांना ईडब्ल्यूएस, एनसीएल, सीव्हीसी, टीव्हीसीबाबतची मूळ प्रमाणपत्रे अंतिम प्रवेश प्रक्रियेच्या दिनांकापर्यंत सादर करण्याची सवलत देण्याचा निर्णय घेण्यात आला, अशी माहिती उच्च व तंत्रशिक्षणमंत्री चंद्रकांत पाटील यांनी दिली.
विद्यार्थ्यांना प्रवेशासाठी जातप्रमाणपत्र आणि जातपडताळणी प्रमाणपत्र वेळेत मिळत नसल्याच्या तक्रारी अनेक विद्यार्थी आणि पालक करत असतानाच राज्य सामाईक प्रवेश परीक्षा कक्षामार्फत ऑनलाइन नोंदणी प्रक्रिया सुरू आहे. याअंतर्गत उमेदवारांकडून ऑनलाइन अर्ज मागविण्यात आले होते, ज्यांची तारीख ८ जुलै होती; परंतु ती आता ११ जुलैपर्यंत वाढविण्यात आली आहे. प्रवेश प्रक्रियेसाठी अर्ज सादर करताना ज्या उमेदवारांनी जात प्रमाणपत्र पडताळणीऐवजी जात पडताळणीसाठी केलेल्या अर्जाची पावती सादर केली आहे, अशा विद्यार्थ्यांना केंद्रीय अंतिम प्रवेश प्रक्रियेच्या अंतिम दिनांकापर्यंत प्रवेश घेता येणार आहे. विद्यार्थी व पालकांची मागणी लक्षात घेऊन ही मुदतवाढ देण्यात येत आहे.
मंत्री चंद्रकांत पाटील म्हणाले, यानंतरही जात पडताळणी प्रमाणपत्र सादर करण्यासाठी काही तांत्रिक अडचणी विद्यार्थ्यांना येऊन शैक्षणिक नुकसान होऊ नये, यासाठी हा प्रस्ताव मंत्रिमंडळासमोर ठेवून यावर धोरणात्मक निर्णय घेण्यात येईल. या निर्णयामुळे अनेक उमेदवारांना आपला प्रवेश घेण्यासाठी वेळ मिळणार आहे. विद्यार्थ्यांनी आणि पालकांनी अधिक माहितीसाठी राज्य सामाईक प्रवेश परीक्षा कक्षाच्या अधिकृत संकेतस्थळाला नियमित भेट द्यावी.