नियमांचे पालन न करणाऱ्यांवर कारवाई करा : सरनाईक
सकाळ वृत्तसेवा
मुंबई, ता. ११ : राज्यातील ॲप आधारित बस, कार, बाइक टॅक्सी यांनी व्यवसाय करताना कायदेशीर तत्त्वांचे पालन करणे आवश्यक आहे. यामध्ये खासगी वाहतूक करणाऱ्यांनी नियमांचे उल्लघंन केल्यास त्यांच्यावर कायदेशीर कारवाई करण्याचे निर्देश परिवहनमंत्री प्रताप सरनाईक यांनी दिले.
विधान भवन येथे ॲपवर आधारित वाहनांच्या सेवा या विषयासंदर्भात बैठकीत परिवहनमंत्री प्रताप सरनाईक बोलत होते. या वेळी परिवहन आयुक्त विवेक भीमनवार यांच्यासह परिवहन विभागाचे इतर अधिकारी उपस्थित होते. सरनाईक म्हणाले की, ‘राज्य शासन नेहमीच या क्षेत्रात होणाऱ्या सकारात्मक बदलांसाठी नावीन्यपूर्ण उपक्रमांना पाठबळ देत आले आहे. कोणत्याही ॲपवर आधारित बस, कार, बाइक टॅक्सी यांनी कायदेशीर बाबींचे पालन करूनच वाहतूक व्यवसाय केला पाहिजे. नियमांचे उल्लंघन करणाऱ्यांवर कारवाई केली जाईल.’ नियम हे प्रवाशांच्या हिताचे असल्यामुळे त्यांच्या हिताचे संरक्षण होणे, तितकेच महत्त्वाचे आहे. त्यामुळे मार्गदर्शक सूचनांचे उल्लंघन झाल्यास कडक कारवाई करण्यात येईल, असेही त्यांनी या वेळी सांगितले.