इ-चालान असल्याचे
भासवून फसवणूक
मुंबई, ता. १४ ः वाहतूक पोलिसांनी इ-चालान पाठवल्याचा आभास निर्माण करून सायबर भामट्यांनी एका व्यक्तीच्या बँक खात्यातून परस्पर सव्वालाख रुपये लाटले. एपीके फाईलद्वारे फसवणुकीची ही कार्यपद्धती सध्या शहरात फोफावत असून नागरिकांना सतर्क राहण्याचे आवाहन पोलिसांनी केले आहे.
ओशिवरा पोलिसांनी दिलेल्या माहितीनुसार, तक्रारदार खासगी कंपनीत नोकरी करीत असून, त्यांना आलेला एक मेसेज हा आरटीओकडून आल्याचा दावा करण्यात आला होता. वाहतूक नियम मोडल्याबद्दल ई-चालानबाबत हा आदेश असावा, असे वाटल्याने तक्रारदाराने संदेशातील लिंक उघडली. त्यात तक्रारदाराच्या बँकिंग तपशिलांची मागणी करण्यात आली होती. ती देताच एक ओटीपी प्राप्त झाला. तेव्हा तक्रारदाराला संशय वाटल्याने त्याने ती फाईल नष्ट केली. लगोलग त्याने बँकेशी संपर्क साधून परस्पर व्यवहार झाले आहेत का, याची खातरजमा केली. मात्र पैसे वजा न झाल्याने त्यांनी सुटकेचा विश्वास सोडला; मात्र थोड्याच वेळात त्याच्या खात्यातून सव्वा लाख परस्पर वळते झाले.