वांद्र्यात चाळ कोसळून
१२ जण जखमी

दोघांची प्रकृती गंभीर

सकाळ वृत्तसेवा
मुंबई, ता. १८ : वांद्रे (पूर्व) येथील भारतनगर परिसरात शुक्रवारी (ता. १८) सकाळी ६च्या सुमारास दुमजली चाळ कोसळून बारा जण जखमी झाले आहेत. यात दोघांची प्रकृती गंभीर असून या घटनेनंतर झालेल्या सिलिंडर स्फोटात ते होरपळले आहेत. त्यांच्यावर केईएम रुग्णालयात उपचार सुरू आहेत.

नमाज कमिटी मशिदीजवळ असलेली चाळ क्रमांक ३७ ही जीर्ण आणि धोकादायक स्थितीतील दोन मजल्यांची सिमेंट शीटची संरचना कोसळल्यानंतर सिलिंडरचा स्फोट झाला. मुंबई अग्निशमन दलाने तत्काळ घटनास्थळी धाव घेऊन बचावकार्यात दोन अतिरिक्त विभागीय अधिकारी, पाच वरिष्ठ अधिकारी, पाच फायर इंजिन्स, रेस्क्यू व्हॅन, पाण्याचा टँकर व १०८ ॲम्ब्युलन्स सेवा कार्यरत झाल्या होत्या. ढिगाऱ्याखाली अडकलेल्या दोन जणांची सुटका करण्यात आली असून संपूर्ण परिसरात शोध व बचावकार्य सुरू आहे. वांद्रे येथील भाभा रुग्णालयाचे वैद्यकीय अधीक्षक डॉ. विनोद खाडे यांनी दिलेल्या माहितीनुसार, १२ जखमींपैकी रेहाना अन्सारी (वय ६५) व मोहम्मद अन्सारी (६८) हे दोघे अंदाजे ५० टक्के भाजले असून त्यांची स्थिती चिंताजनक आहे. त्यांना केईएम रुग्णालयात हलवण्यात आले आहे. उर्वरित १० जणांची प्रकृती सध्या स्थिर असून त्यांच्यावर वांद्रे भाभा रुग्णालयात उपचार सुरू आहेत. या घटनेनंतर म्हाडा, पीडब्ल्यूडी व महापालिका यंत्रणा घटनास्थळी दाखल झाल्या असून इमारत कोसळण्यामागील नेमके कारण शोधण्याचे काम सुरू आहे. परिसरातील इतर जुन्या इमारतींचीही तपासणी सुरू करण्यात आली आहे.
----