मुंबई विद्यापीठाचा कौशल्य विकासासाठी करार
मुंबई, ता. २१ ः पदवीचे शिक्षण घेतानाच प्रत्यक्ष उद्योगाधारित अनुभव आणि कौशल्य विकासासाठी मुंबई विद्यापीठ आणि भारत सरकारच्या शिक्षण मंत्रालयाच्या कौशल्य प्रशिक्षण मंडळ पश्चिम विभाग यांच्यात सामंजस्य करार करण्यात आला. मुंबई विद्यापीठाचे कुलगुरू प्रा. रवींद्र कुलकर्णी, कौशल्य प्रशिक्षण मंडळाचे क्षेत्रीय संचालक पी. एन. जुमले, सहाय्यक संचालक एन. सी. गांगडे, मुंबई विद्यापीठाचे प्र. कुलगुरू प्रा. अजय भामरे आदी उपस्थित होते.
देशातील उच्च शिक्षणाला उद्योगसुसंगत बनवण्यासाठी हा करार एक महत्त्वाचे पाऊल आहे. या माध्यमातून पारंपरिक अभ्यासक्रमांमध्ये उद्योगआधारित प्रशिक्षणाचा समावेश केला जाणार आहे. विद्यार्थ्यांना केवळ सैद्धांतिक ज्ञानच नव्हे, तर प्रत्यक्ष कार्यानुभव, अद्ययावत कौशल्य विकास आणि सध्याच्या रोजगार बाजारपेठेसाठी आवश्यक असलेली रोजगारक्षमता प्रदान केले जाणार आहे. तसेच, उच्च शिक्षण अधिक परिणामकारक आणि रोजगाराभिमुख बनविण्यासाठी हा करार महत्त्वाचा असल्याचे कुलगुरू प्रा. रवींद्र कुलकर्णी यांनी सांगितले.