‘गोविंदां’साठी एक हजार स्वयंसेवक तैनात

मुंबई, ता. २१ : दहीहंडी उत्सव जल्लोषात आणि सुरक्षिततेने पार पडावा, यासाठी पालिकेकडून मोठा निर्णय घेण्यात आला आहे. मुंबई उपनगरचे पालकमंत्री तथा सांस्कृतिक कार्यमंत्री ॲड. आशीष शेलार यांनी महापालिकेला १९१६ या हेल्पलाइन क्रमांकाचे टीशर्ट घातलेले एक हजार स्वयंसेवक तैनात करण्याचे निर्देश दिले आहेत. दहीहंडी समन्वय समिती, महापालिका, पोलिस, वाहतूक विभाग, जे. जे. रुग्णालय, अग्निशमन दल आदी यंत्रणांच्या आढावा बैठकीत शेलार यांनी हे निर्देश दिले. ही बैठक सोमवारी (ता. २१) पु. ल. देशपांडे कला अकादमीत पार पडली. या बैठकीस समन्वय समितीचे बाळा पडेलकर, गीता झगडे, डेव्हिड फर्नांडिस, तुषार वावेकर यांच्यासह पोलिस उपायुक्त अकबर पठाण, आपत्ती व्यवस्थापन प्रमुख रश्मी लोखंडे आणि वैद्यकीय अधिकारी डॉ. श्रीकांत पारडे हे उपस्‍थित होते. उत्सव काळात गर्दी नियंत्रण, वैद्यकीय आपत्कालीन मदत, स्वच्छता व सुरक्षिततेसाठी वेगवेगळ्या विभागांमधील समन्वय अधिक बळकट करणे, यासह रुग्णालय मार्गाचा आराखडा तयार करण्याचेही निर्देश या वेळी देण्यात आले.

....