हार्बर मार्गावर रात्रकालीन विशेष ब्लॉक
वाशी स्थानकात इलेक्ट्रॉनिक इंटरलॉकिंगचे काम

सकाळ वृत्तसेवा
मुंबई, ता. ४ : हार्बर मार्गावरील वाशी रेल्वे स्थानकात इलेक्ट्रॉनिक इंटरलॉकिंगचे काम करण्यात येणार आहे. त्यासाठी मंगळवार (ता. ५) ते शुक्रवार (ता. ८) दरम्यान दररोज रात्री १०.४५ ते पहाटे ३.४५ या वेळेत अप व डाउन मार्गावर विशेष ब्लॉक घेण्यात येणार आहे. या कालावधीत वाशी ते पनवेलदरम्यानची लोकल सेवा पूर्णपणे बंद राहणार आहे.

ब्लॉकदरम्यान काही लोकल सेवा पूर्णपणे रद्द करण्यात आली आहे. काही गाड्या ठरावीक स्थानकांपर्यंतच धावणार आहेत. बेलापूरहून रात्री ८.५४ वाजता सुटणारी बेलापूर-सीएसएमटी लोकल वाशीपर्यंतच धावेल, तर रात्री ९.१६ची बेलापूर-सीएसएमटी लोकल वडाळा रोडपर्यंतच धावणार आहे. वांद्रे-सीएसएमटी लोकल रात्री १० वाजता सुरू होऊन वडाळा रोडवरच थांबवण्यात येणार आहे. पनवेलहून रात्री १०.५५ आणि ११.३२ वाजता सुटणाऱ्या पनवेल-वाशी लोकल सेवा नेरूळपर्यंतच चालविण्यात येणार आहेत.
ब्लॉक कालावधीत काही गाड्यांच्या मार्गात बदल करण्यात आला आहे. वडाळा रोडवरून पहाटे ५.०६ आणि ५.५२ची पनवेल लोकल तसेच पहाटे ४.५२ आणि ५.३०ची सीएसएमटी-पनवेल लोकल नेरूळ स्थानकातून चालविण्यात येणार आहे. सीएसएमटीहून पहाटे ५.१० वाजता सुटणारी गोरेगाव लोकल वडाळा रोडवरून सुरू होणार आहे.
ब्लॉकदरम्यान वाशी स्थानकातून पहाटे ४.०३, ४.१५, ४.२५, ४.३७, ४.५० आणि ५.०४ वाजता सुटणाऱ्या अप लोकल सेवा रद्द करण्यात आल्या आहेत. तसेच सीएसएमटी स्थानकातून रात्री ९.५०, १०.१४ आणि १०.३० वाजता सुटणाऱ्या डाउन लोकल सेवाही रद्द करण्यात आल्या आहेत.