कृत्रिम तलावांची संख्या वाढणार
पर्यावरणपूरक गणेशोत्सवाची पालिकेची तयारी
सकाळ वृत्तसेवा
मुंबई, ता. ६ : यंदाच्या गणेशोत्सवात अधिकाधिक पर्यावरणपूरक विसर्जन करण्यासाठी महापालिका कृत्रिम तलावांची संख्या वाढवणार आहे. गेल्यावर्षी २०४ कृत्रिम तलावांची उभारणी करण्यात आली होती. यंदा ही संख्या वाढवून विसर्जनासाठी सुविधा अधिक सुटसुटीत केली जाणार आहे, अशी माहिती उपआयुक्त व गणेशोत्सव समन्वयक प्रशांत सपकाळे यांनी दिली.
परळ येथील एफ दक्षिण विभागात आयोजित बैठकीत सपकाळे यांनी गणेश मंडळांना आवाहन केले, की नागरिकांनी पर्यावरणपूरक शाडू मूर्तींचा वापर करावा आणि कृत्रिम तलावातच विसर्जन करावे. शासनाच्या आदेशानुसार प्लॅस्टर ऑफ पॅरिसपासून बनवलेल्या घरगुती मूर्तींचे विसर्जन केवळ कृत्रिम तलावातच होणार आहे.
पालिकेडून मोफत शाडू माती, मंडपासाठी जागा आणि प्रायोगिक तत्त्वावर पर्यावरणपूरक रंग उपलब्ध करून दिले जातील. विसर्जनानंतर तलावातील गाळाचा पुनर्वापर केला जाणार असून, यावर महानगरपालिका देखरेख ठेवणार आहे.
बैठकीत सहभागी गणेश मंडळांनी विविध मागण्या मांडल्या. त्यामध्ये रस्त्यांवरील खड्डे, झाडांच्या फांद्यांची छाटणी, महिला भाविकांसाठी सुविधा, खाद्यपदार्थांतील भेसळ नियंत्रण आदी मुद्द्यांचा समावेश होता. पालिकेने या मागण्या योग्य प्रकारे मार्गी लावण्याचे आश्वासन दिले.
....