आईमुळे मुलीला पुनर्जन्म
नऊ वर्षांच्या मुलीवर यशस्वी यकृत प्रत्यारोपण
सकाळ वृत्तसेवा
मुंबई, ता. ७ : विल्सन रोगामुळे यकृत तीव्र निकामी होऊन कोमामध्ये गेलेल्या सुरत येथील नऊ वर्षांच्या मुलीला आईने दिलेल्या यकृताच्या भागामुळे मुलीला जीवनदान मिळाले आहे.
सुरत येथे राहणाऱ्या नऊ वर्षांच्या मुलीला तातडीने मुंबईतील महापालिकेच्या केईएम रुग्णालयात आणण्यात आले. प्राथमिक उपचारानंतर मुलीची स्थिती स्थिर झाल्यावर, तिला दुर्मिळ रोग योजनेंतर्गत तत्काळ नोंदणी करून २४ तासांत प्रत्यारोपणासाठी मंजुरी मिळवण्यात आली.
तिच्या आईनेच यकृत दान करण्याचा निर्णय घेतल्याने दात्याची प्रतीक्षा करण्याची गरज पडली नाही. त्यानुसार, आईच्या यकृताच्या तपासण्या करण्यात आल्या. त्यानंतर आईचे यकृत मुलीला जुळत असल्याचे समोर आले. डॉक्टरांकडून यकृत प्रत्यारोपणाचा निर्णय घेण्यात आला.
या शस्त्रक्रियेसाठी केईएम रुग्णालयातील गॅस्ट्रो विभागाचे प्रमुख डॉ. आकाश शुक्ला यांनी आपल्या टीमसह पुढाकार घेतला आणि यकृत प्रत्यारोपण यशस्वीरीत्या पार पाडले. डॉक्टर चेतन कंथारिया यांचाही या टीममध्ये समावेश होता. तब्बल आठ तास चाललेली ही शस्त्रक्रिया यशस्वी ठरली असून रुग्णाची प्रकृती आता पूर्णपणे स्थिर आहे.
आयसीयूमध्ये उपचार घेत असताना मुलीने पाच सुंदर चित्रेही काढली. यकृत विकारामुळे सुरुवातीला डोळे पिवळे होणे, पोटात सूज येणे अशी लक्षणे दिसून आली होती. त्यानंतर तिच्या मेंदूवरही परिणाम होऊन ती कोमात गेली.