रक्षाबंधनासाठी टपाल विभागाचा खास उपक्रम
लाडक्या बहिणींची राखी भावापर्यंत न भिजता पोहोचणार; वॉटरप्रूफ लिफाफे
सकाळ वृत्तसेवा
मुंबई, ता. ७ : भारतीय डाक विभागाने मागील काही वर्षांपासून ग्राहकाभिमुख सेवांवर भर दिला आहे. बाजारातून राख्या व लिफाफा खरेदी करून ते पॅक करून पोस्टात जाऊन वजनानुसार शुल्क भरून पाठवावे लागते. आता मात्र लाडक्या बहिणींची राखी भावापर्यंत पोहोचवण्यासाठी टपाल विभागाने आकर्षक आणि वॉटरप्रूफ लिफाफे उपलब्ध केले आहेत. त्यामुळे बाजारातून राखीची अणि पोस्टातून लिफाफ्याची खरेदी करता येणार आहे.
पोस्ट विभागाच्या या लिफाफ्यांमुळे देशभरात कुठेही राखी पाठवता येणार आहे. स्पीड, रजिस्टर पोस्ट तसेच साध्या टपालाने देशभरात राखीचा लिफाफा देशभरात कुठेही पाठवण्याची सोय पोस्ट विभागात आहे.
==
खासगी कुरिअरपेक्षा स्वस्त सेवा
खासगी कुरिअरद्वारे राख्या पाठविण्यासाठी बाजारातून मिळणारे पाकीट अथवा लिफाफा टिकाऊ नसतो. शिवाय ते बंद करण्यासाठी ग्लू किंवा पेस्टचा खर्च करावा लागतो. पोस्ट सेवा, अंतर आणि वजनानुसार लागणारे शुल्कही खासगी कुरिअरच्या तुलनेत कमी आहे.
==
पोस्टाच्या विशेष लिफाफ्यांची वैशिष्ट्ये
पोस्टाच्या लिफाफ्यांवर राखीशी संबंधित सुबक छपाई असून दिसायला आकर्षक आहे. प्लॅस्टिक कोटेड असल्याने ते मध्येच फाडता येत नाहीत व भिजतही नाहीत. हा लिफाफा ग्लूसहित असल्याने वेगळा खर्च करून चिकटविण्याची गरज नाही.
-===
भावा-बहिणींच्या नात्याचा दुवा
रक्षाबंधनाला बहीण-भाऊ बाहेरगावी राहत असतील, सणासाठी एकत्र येऊ शकत नसतील किंवा इतर अडचणींमुळे राख्या पोस्टाने पाठविल्या जातात. श्रावण सुरू होताच पोस्टाद्वारे मोठ्या प्रमाणात राख्या पाठविल्या जातात. सुरक्षित, विश्वासार्ह व माफक दरामुळे पोस्ट विभाग भावा-बहिणींच्या नात्याचा दुवा बनलेला आहे.
==
१२ रुपयांचा लिफाफा, वजनानुसार पोस्टेज
पोस्टाच्या या वॉटरप्रूफ व आकर्षक लिफाफ्याची किंमत केवळ १२ रुपये आहे. भरलेल्या राख्या लिफाफ्याच्या वजनानुसार पाठविण्याचे शुल्क ठरते.
==