अनंत चतुर्दशीची सुट्टी पूर्ववत करा!

मुंबई, ता. ७ : राज्य सरकारने यंदा अनंत चतुर्दशीऐवजी २ सप्टेंबरला सार्वजनिक सुट्टी जाहीर केली आहे. या निर्णयाला बृहन्मुंबई सार्वजनिक गणेशोत्सव समन्वय समितीने तीव्र विरोध केला असून, मागील ३० वर्षांपासून सुरू असलेली अनंत चतुर्दशीची सुट्टी पूर्ववत करावी, अशी मागणी समितीने मुख्यमंत्री देवेंद्र फडणवीस यांच्याकडे केली आहे.
मुंबईत हजारो सार्वजनिक गणेश मंडळे दहा दिवसांचा उत्सव साजरा करतात. अनंत चतुर्दशीला विसर्जन मिरवणुकीत लाखो गणेशभक्त सहभागी होतात. त्यामुळे वाहतूक व्यवस्थापन, सार्वजनिक सुरक्षा आणि नागरिकांचा सहभाग यासाठी ही सुट्टी अत्यावश्यक असल्याचे समितीचे अध्यक्ष अ‍ॅड. नरेश दहिबावकर यांनी स्पष्ट केले. १९९५ मध्ये बाळासाहेब ठाकरे यांच्या पुढाकाराने ही सुट्टी लागू करण्यात आली होती. शनिवार असूनही अनेक खासगी आस्थापने सुरू राहतात, त्यामुळे कर्मचाऱ्यांना मिरवणुकीत सहभागी होता येत नाही, असेही त्यांनी सांगितले. सरकारने ७ ऑगस्टला काढलेले शुद्धिपत्रक मागे घ्यावे, अशी समितीची मागणी आहे.