नवोदित चित्रपट निर्मात्याला १७ लाखांचा गंडा
मुंबई, ता. ७ : एका नवोदित चित्रपट निर्मात्याची तब्बल १७ लाख रुपयांची फसवणूक झाल्याचा प्रकार समोर आला आहे. चित्रपट निर्मितीसाठी पाच कोटी रुपयांचे अर्थसहाय्य देण्याच्या नावाखाली भामट्यांनी ही फसवणूक केली आहे. ही घटना ४ जुलै रोजी वडाळा येथे घडली.
पोलिसांनी दिलेल्या माहितीनुसार, अभिनेता अभय झा याच्यासोबत आरोपींनी फायनान्स क्षेत्रात काम करीत असल्याचं सांगत ओळख वाढवली. अभयला पाच कोटी रुपयांचे अर्थसहाय्य हवे होते. आरोपींनी त्याला हे काम होईल, असे आश्वासन दिले. एक दिवस अचानक आरोपींपैकी एक असलेल्या महेंद्रसिंगने अभयला सांगितले, की त्याच्या बहिणीचे लग्न ठरलं आहे आणि त्याच्याकडे १०० रुपयांच्या नोटांमध्ये १७ लाख रुपये आहेत. ते गावी घेऊन जाणे जोखमीचे असल्याचे सांगत त्याने अभयला ती रक्कम ५०० रुपयांच्या नोटांमध्ये बदलून देण्याची विनंती केली. अभयने रक्कम तयार ठेवल्याचे कळवल्यावर महेंद्रसिंगने त्याला दादरला बोलावले.
दादरला अभय पोहोचल्यावर आयुष नावाचा आरोपींचा साथीदार त्याला भेटला. महेंद्रसिंग वडाळ्यात पैशांची अदलाबदल करण्यासाठी वाट पाहात असल्याचे त्याने सांगितले. अभय आयुषसोबत वडाळ्यातील एका कॉफी शॉपमध्ये पोहोचला. तिथे एका व्यक्तीकडे त्याने पैशांची बॅग दिली, पण लगेचच आरोपींची गाडी तिथून निघून गेली आणि आयुषही पसार झाला. आपली फसवणूक झाल्याचे लक्षात येताच अभयने पोलिसांत तक्रार दाखल केली. माटुंगा पोलिसांनी याप्रकरणी पाच जणांविरोधात गुन्हा नोंदविला आहे.