दहीहंडी उत्सवावर पोलिसांचे विशेष लक्ष
शहरात कडेकोट बंदोबस्त
मुंबई, ता. १५ : यंदाच्या दहीहंडी उत्सवावर पोलिसांनी विशेष लक्ष केंद्रित केले असून, कोणतीही अनुचित घटना किंवा गुन्ह्याचे गालबोट लागू नये आणि कायदा व सुव्यवस्थेचा प्रश्न उद्भवू नये, या उद्देशाने शहरात जागोजागी पोलिसांनी कडेकोट बंदोबस्ताचे नियोजन केले आहे.
निवडणुकांपूर्वी संभाव्य उमेदवारांनी सर्वसामान्य जनतेपर्यंत पोचण्यासाठी दहीहंडी आयोजनात विरोधकांपेक्षा वरचढ ठरण्यासाठी शर्थ केली आहे. तसेच आगामी निवडणुकांमध्ये उमेदवारी मिळवण्यासाठीच्या चढाओढीमुळे शनिवारी (ता. १६) दहीहंडी स्पर्धांच्या निमित्ताने जागोजागी राजकीय शक्तिप्रदर्शन होण्याची शक्यता आहे. त्यामुळे विरोधी गटांमधील संघर्ष नाकारता येत नाही. त्यामुळे यंदा दहीहंडी उत्सवावर विशेष लक्ष असल्याचे एका वरिष्ठ अधिकाऱ्याने सांगितले.
याव्यतिरिक्त दहीहंडी फोडण्यासाठी रचण्यात येणाऱ्या मानवी मनोऱ्यांचा थरार सर्वसामान्य नागरिकांना आकर्षित करतो. त्यामुळे हा उत्सव कायम गर्दी खेचणारा ठरतो. त्यातच गेल्या काही वर्षांपासून या उत्सवाला आलेल्या व्यावसायिक स्वरूपामुळे गर्दीत अधिक भर पडते. परिणामी जागोजागी आयोजित स्पर्धेच्या ठिकाणांचे गर्दीचे नियोजन, गर्दीची संधी साधून घडणारे गुन्हे, महिलाविरोधी गुन्हे रोखणे हाही प्रमुख उद्देश असल्याचे या अधिकाऱ्याने स्पष्ट केले.
उच्च न्यायालयाने, पोलिस आयुक्तालयाने त्या त्या वेळी जारी केलेल्या डीजे, १४ वर्षांखालील गोविंदा इत्यादी मनाई आदेशांची अंमलबजावणी करण्यासाठीही मनुष्यबळ जोडण्यात आले आहे. गेल्या काही दिवसांत स्थानिक पोलिसांनी आपापल्या हद्दीतील आयोजक, गोविंदा पथकांना अपघात प्रतिबंधक योजनांबाबत मार्गदर्शक सूचना दिल्या आहेत.

...अन्यथा कारवाई
सार्वजनिक ठिकाणी महिलांना पाहून अश्लील शेरेबाजी, अश्लील गाणी, हातवारे, छेड काढणाऱ्यांवर कडक कारवाई केली जाईल, असा इशारा पोलिसांनी विशेष आदेशाद्वारे जारी केला आहे. उत्साहाच्या नादात भावना दुखावतील अशा प्रतिमा, चिन्हे, फलक यांचे प्रदर्शन करू नये. रंगीत पाणी, फुग्यांचा वापर करू नये, असेही बजावले आहे.