पुरात अडकून पडलेल्या ५० विद्यार्थ्यांचे पोलिसांकडून बचावकार्य
माटुंगा गांधी मार्केट परिसरात साचले पाणी
मुंबई, ता. १८ ः माटुंगा येथील गांधी मार्केट परिसरात सोमवारी (ता. १८) सकाळी गुडघाभर पाण्यात अडकून पडलेल्या शाळांच्या दोन बसमधील सुमारे ५० विद्यार्थ्यांना पोलिसांनी सुखरूप बाहेर काढून पालकांच्या हवाली केले.
उधाणात पडलेल्या मुसळधारेने सकाळी शहरातील बहुतांश सखल भागांत पाणी साचू लागले. गांधी मार्केट येथील डॉ. बाबासाहेब आंबेडकर मार्गही त्यास अपवाद नव्हता. येथे गुडघाभर पाणी साचले होते. त्यात पाऊस थांबत नसल्याने पाण्याची पातळी वाढत होती. अशात दोन स्कूल बस या पाण्यात बंद पडल्या. त्यात एकूण ५० हून अधिक विद्यार्थी आणि चार परिचर महिला होत्‍या.
पाणी वाढू लागल्याने लहान विद्यार्थी घाबरले होते. माहिती मिळताच पालक अस्वस्थ झाले. परिमंडळ चारच्या उपआयुक्त आर. रागसुधा यांनी वेळ न दवडता माटुंगा पोलिस ठाण्याचे वरिष्ठ निरीक्षक राजेंद्र पवार यांना बचावकार्य सुरू करण्याच्या सूचना दिल्या. वरिष्ठ निरीक्षक पवार आणि त्यांच्या पथकाने लगोलग अडकून पडलेल्या बसमधील विद्यार्थी, महिला आणि चालकांना सुखरूपपणे बाहेर काढून पोलिस ठाण्यात आणले.
पोलिसांनी विद्यार्थ्यांना लहान मुलांसाठी खास तयार करून घेतलेल्या बाल कक्षात आणले. तेथे सर्वांना खाऊ वाटण्यात आला. त्यानंतर पालकांनी पोलिस ठाणे गाठून मुलांना घरी नेले. या बचावकार्यासाठी पालकांनी पोलिसांचे आभार मानले.

बंद वाहने बाजूला घेण्यापासून पादचाऱ्यांना मार्गदर्शन
दरवर्षी पावसाळ्यात शहरात सखल भागात पाणी साचून नागरिकांची त्रेधा उडते. अशा परिस्थितीत कर्तव्यावर असलेले पोलिस अधिकारी आणि अंमलदार माणुसकीच्या नात्याने अडकून पडलेल्या प्रत्येकापर्यंत मदतीचा हात पोहोचवण्यासाठी शर्थ करत असतात. यंदाच्या पावसाळ्यात सोमवारीही पोलिसांच्या मानवतेत खंड पडला नव्हता. सखल भागात अडकून पडलेल्या वाहमानांमधील प्रवाशांना सुखरूप बाहेर काढून सुरक्षित ठिकाणी घेऊन जात होते. बंद पडलेली वाहने रस्त्याकडेला घेऊन अन्य वाहनांना वाट मोकळी करून देत होते. पाणी साचलेल्या ठिकाणी गटारे, नाले, उघडे मेनहोल आदी ठिकाणी उभे राहून पादचारी, वाहनांना योग्य मार्गदर्शन करत होते.