पम्‍पिंग स्‍टेशन ठरली निष्‍क्रिय
निचरा धीम्या गतीने; ठिकठिकाणी तुंबले पाणी
सकाळ वृत्तसेवा
मुंबई, ता. १८ : सकाळपासून सुरू असलेल्या मुसळधार पावसामुळे मुंबईसह उपनगरांमध्ये ठिकठिकाणी पाणी भरले होते. पाण्याचा निचरा करण्यासाठी हिंदमाता, माटुंगा येथील गांधी मार्केट, चुनाभट्टी आणि मशीद बंदर आदी आठ ठिकाणी पालिकेने बसवलेले पाणी उपसा पंप निष्‍क्रिय ठरले. त्‍यामुळे आपले घर गाठताना मुंबईकरांना मोठी कसरत करावी लागली.
दिवसभर पाणी तुंबून राहिल्याने मुंबईकरांना नाहक त्रास सहन करावा लागला. पाणी साचू नये, यासाठी पालिकेने शर्तीचे प्रयत्‍न केले, मात्र पाऊस मुसळधार पडत असल्‍याने पालिकेचे पम्‍पिंग स्‍टेशन अपुरे पडल्‍याचे दिसून आले. तुंबलेल्या पाण्याचा निचरा करण्याचे ठिकठिकाणी पालिकेचे प्रयत्न सुरू होते.
हिंदमाता पम्‍पिंग स्टेशनमुळे दादर, परळ, डॉ. आंबेडकर रोड या पाण्याचा निचरा होतो, मात्र दिवसभर हिंदमाता परिसरात तुंबलेल्या पाण्याचा निचरा होऊ न शकल्‍याने या भागातील नागरिकांना त्रास सहन करावा लागला. तसेच वाहतुकीलाही तुंबलेल्या पाण्याचा फटका बसला.
माटुंगा गांधी मार्केटचा परिसर हा सखल भागात असल्याने येथेही हिंदमाताप्रमाणे पावसाळ्यात पाणी भरते. पालिकेने येथे उभारलेले पम्‍पिंग स्‍टेशन माटुंगा, वडाळा आणि हिंदू कॉलनी या परिसराला पावसाळ्यात तुंबलेल्या पाण्यापासून दिलासा देते, मात्र आज येथेही दिवसभर पाणी तुंबून होते. त्या पाण्याचा निचरा झाला नाही.
चुनाभट्टी या भागात पाणी भरल्याने त्याचा परिणाम थेट हार्बर रेल्वेला बसतो. कुर्ला, सायन आणि चुनाभट्टी या मार्गावरील रेल्वे रुळांवर पाणी साचले होते. कुर्ला भागातून येणाऱ्या मिठी नदीचे पाणी चुनाभट्टी भागात तुंबल्याने चुनाभट्टीचा परिसर जलमय झाला होता. पी डिमेलो मार्ग, येलो गेट येथील मिनी पम्‍पिंग स्टेशन प्रभावी ठरले नसल्याचे दिसून आले. पावसाने भरलेला पाण्याचा निचरा झाला नसल्याने त्याचा नागरिकांना त्रास सहन करावा लागला.
.......