झाड पडल्याने एकाचा मृत्यू
दिवसभरात चौघे जखमी; एक बेपत्ता

मुंबई, ता. १८ ः मुंबईत दिवसभर सुरू असलेल्या मुसळधार पावसामुळे तीन वेगवेगळ्या दुर्घटनांमध्ये एकाचा मृत्यू झाला, चौघे जखमी झाले, तर एक जण बेपत्ता असल्याची माहिती अग्निशमन दलाकडून देण्यात आली.
नेपियन सी रोडच्या शिमला हाउस परिसरातील हैदराबाद इस्टेट येथे सार्वजनिक बांधकाम विभागाची संरक्षक भिंत एका झाडावर कोसळली. त्यामुळे झाड कोसळून झालेल्या अपघातात सितेश तिरके (वय ५५) हे गंभीर जखमी झाले. त्यांना तातडीने नायर रुग्णालयात दाखल करण्यात आले; मात्र डॉक्टरांनी त्यांना मृत घोषित केले. याशिवाय सहार रोडच्या पारसीवाडी येथे झाड पडून जयंत गोसावी (वय ४०) हे जखमी झाले. त्यांना उपचारासाठी कूपर रुग्णालयात दाखल करण्यात आले आहे. दरम्यान, वांद्रे-कुर्ला संकुल परिसरातील वाल्मिकनगर येथे एक व्यक्ती नाल्यात वाहून गेल्याची घटना सोमवारी सकाळी घडली. अग्निशमन दलाचे जवान आणि स्थानिक प्रशासनाकडून त्याचा शोध घेतला जात आहे.
अंधेरी येथील डी.एन. नगर पोलिस वसाहतीत स्लॅब कोसळून आज दुपारी घडलेल्या दुर्घटनेत तीन मुले जखमी झाली. जखमींना नजीकच्या रुग्णालयात दाखल करण्यात आले आहे. त्यांची प्रकृती स्थिर असल्याचे रुग्णालयाने सांगितले. मुसळधार पावसामुळे शहरात चार, पूर्व उपनगरात तीन, तर पश्चिम उपनगरात पाच झाडे कोसळली, तर एकूण १२ ठिकाणी झाडांच्या फांद्या कोसळल्या.