विक्रमी ८३.६९ टक्के मतदान
-बेस्ट क्रेडिट सोसायटी निवडणूक

सकाळ वृत्तसेवा
मुंबई, ता. १८ :‘दि बेस्ट एम्प्लॉइज को-ऑपरेटिव्ह क्रेडिट सोसायटी लि.’च्या निवडणुकीसाठी आज (ता. १८) मतदान पार पडले. एकूण १५,६५६ पात्र मतदारांपैकी १२,६५६ मतदारांनी मतदानाचा हक्क बजावला असून, मतदानाचे प्रमाण ८३.६९ टक्के इतके झाले.
सर्वाधिक म्हणजे १०० टक्के मतदानाची नोंद मुलुंड, ओशिवरा, पाठकवाडी, वीजभवन आणि विक्रोळी आगारात झाली, तर प्रभादेवी (७१.७६ टक्के), मरोळ (७२.१२ टक्के) आणि वडाळा-१ (७२.७५ टक्के) येथे तुलनेने कमी मतदान झाले. निवडणुकीचा निकाल मंगळवारी सकाळी ११ वाजल्यापासून जाहीर होणार असून, ‘उत्कर्ष पॅनेल’ व ‘सहकार समृद्धी पॅनेल’ यांच्यात थेट सामना असल्याचे स्पष्ट झाले आहे.

-‘उत्कर्ष पॅनेल’ व ‘सहकार समृद्धी पॅनेल’ यांच्यात थेट सामना
या निवडणुकीत ठाकरे गट व मनसे समर्थित ‘उत्कर्ष पॅनेल’ आणि भाजप आमदार प्रसाद लाड यांच्या नेतृत्वातील ‘सहकार समृद्धी पॅनेल’ यांच्यात थेट सामना रंगला आहे.
दिवसभर दोन्ही बाजूंनी आरोप-प्रत्यारोपांच्या फैरी झडल्या. प्रसाद लाड यांनी उत्कर्ष पॅनेलवर २४ कोटींच्या अपहाराचा आरोप करत ठाकरे गटाला अडचणीत आणण्याचा प्रयत्न केला, तर ठाकरे गट आणि मनसे यांचा विजय आमचाच होणार, असा दावा आहे. निवडणुकीच्या पार्श्वभूमीवर बेस्ट कामगारांत उत्सुकता शिगेला पोहोचली आहे. निकालाने केवळ सोसायटीचे भवितव्यच नव्हे, तर भाजप-शिवसेना-मनसे यांच्यातील राजकीय समीकरणांवरही परिणाम होणार आहे.
........