अत्यल्प उत्पन्न गटातील विजेत्यांना सहज मिळणार कर्ज
म्हाडा करणार वित्तीय संस्थांची नेमणूक; कागदपत्रांची कटकट कमी होणार

सकाळ वृत्तसेवा
मुंबई, ता. २२ : म्हाडाच्या लॉटरीत किंवा प्रधानमंत्री अवास योजनेंतर्गत अत्यल्प उत्पन्न गटातील सदनिका मिळाल्यानंतर त्यासाठी गृहकर्ज मिळवणे मोठे दिव्याचे काम असते. कमी उत्पन्न असल्याने, अपुरी कागदपत्रांमुळे कर्ज मिळत नाही. त्यामुळे पैसे आणण्याचे कुठून, असा प्रश्न सर्वसामान्यांसमोर उभा राहतो. त्या पार्श्वभूमीवर म्हाडाच्या कोकण मंडळाकडून संबंधितांना सहजपणे कर्ज उपलब्ध व्हावे म्हणून वित्तीय संस्थांची नेमणूक करण्याचा निर्णय घेतला आहे.

म्हाडाच्या लॉटरीसाठी अत्यल्प उत्पन्न गटातील अर्जदारांचे उत्पन्न सहा लाख रुपये असणे आवश्यक आहे. तसेच पीएमएवायअंतर्गतही मर्यादित उत्पन्नाची अट आहे. या उत्पन्न गटात पगारदारांचे कमी प्रमाण असून रिक्षा- टॅक्सीचालक, भाजीविक्रेते, रोजंदारी करणारे, बांधकाम कामगार आदींचा समावेश होतो; मात्र मिळणाऱ्या उत्पन्नाबाबत कोणताच पुरावा नसतो, त्यामुळे त्यांना बँकेतून गृह कर्ज मिळणे कठीण होते. अनेकदा कर्ज न मिळाल्याने संबंधितांना घर घेणे शक्य होत नाही. त्याची दखल घेत म्हाडाच्या कोकण मंडळाने त्यांच्या अखत्यारीतील मुख्य अत्यल्प उत्पन्न गट व पीएमएवाय योजनेंतर्गत सदनिकाधारकांना कर्ज सुविधा उपलब्ध करून देण्याकरिता वित्तीय संस्थेच्या नेमणुकीकरिता ई-निविदा मागवल्या आहेत. त्यानुसार नेमणूक केलेल्या वित्तीय संस्थेकडून संबंधितांना कर्ज मिळणे शक्य होणार आहे.

कागदपत्रांसाठी दमछाक
अत्यल्प उत्पन्न गटातील घर खरेदीदारांकडे अनेकदा अपुरी कागदपत्रे असतात. उत्पन्नाचा पुरावा नसणे, फॉर्म-१६, आयटी रिटर्न नसते. त्यामुळे त्यांना कर्ज घेताना कागदपत्रे जमा करताना मोठी दमछाक होते; पण आता म्हाडा वित्तीय संस्थेची नियुक्ती करणार असल्याने कागदपत्रांची कटकट कमी होणार आहे. मोजक्याच कागदपत्रांच्या आधारे कर्ज मिळू शकणार आहे.