गणपतीपूर्वी सर्व खड्डे भरा
आशीष शेलार यांचे निर्देश

सकाळ वृत्तसेवा
मुंबई, ता. २२ ः सलग तीन दिवस झालेल्या पावसामुळे मुंबईतील रस्त्यांवर निर्माण झालेले खड्डे येत्या तीन दिवसांत म्हणजे गणपतीपूर्वी पूर्णपणे भरा, असे स्पष्ट निर्देश राज्याचे सांस्कृतिक कार्य आणि मुंबई उपनगर पालकमंत्री ॲड. आशीष शेलार यांनी अधिकाऱ्यांना दिले.
यंदापासून राज्य महोत्सव म्हणून गणेशोत्सव साजरा करण्यात येणार असून, याबाबत मुंबईच्या यंत्रणांची आढावा बैठक शेलार यांनी घेतली. या बैठकीला मुंबई महापालिका आयुक्त भूषण गगराणी, वाहतूक पोलिस अधिकारी, एमएसआरडीसी, एमएमआरडीए, एसआरए आणि रेल्वे यांचे अधिकाऱ्यांसह माजी नगरसेवक उपस्थित होते. या वेळी ॲड. शेलार म्हणाले की, मुंबईत पावसामुळे रस्त्यावर निर्माण झालेल्या खड्ड्यांमुळे मुंबईकरांची चिंता वाढली आहे. खड्ड्यांबाबत मोठ्या प्रमाणावर तक्रारी येत असून, आज यासंदर्भात संबंधित अधिकाऱ्यांसोबत बैठक घेतली. महापालिकेकडे आतापर्यंत तब्बल आठ हजार तक्रारी दाखल झाल्या आहेत. याशिवाय अनेक ठिकाणी खड्डे असून, या बैठकीत येत्या तीन दिवसांत, गणपतीपूर्वी सर्व खड्डे पूर्णपणे भरण्याचे स्पष्ट निर्देश दिले.
...
मास्टिक तंत्रज्ञानाचा वापर
महापालिकेकडून खड्डे भरण्यासाठी वापरले जाणारे ‘मास्टिक तंत्रज्ञान’ वाहतुकीच्या दृष्टीने प्रभावी ठरत असल्याने, झोननिहाय नियुक्त कंत्राटदारांकडून हेच तंत्रज्ञान वापरून काम करण्याच्या सूचना आयुक्तांनी दिल्या.
...
...अन्यथा पालिका खड्डे भरेल!
वाकोला, विक्रोळी, गोरेगाव आदी ठिकाणच्या उड्डाणपुलांवर पडलेल्या खड्ड्यांमुळे वाहतुकीची कोंडी वाढत असल्याचे लक्षात घेऊन, एमएसआरडीसीने तातडीने उपाययोजना कराव्यात; अन्यथा महापालिका स्वतः खड्डे भरण्याचे काम हाती घेईल, असा निर्णय बैठकीत घेण्यात आला. गणपतीपूर्वी मुंबई खड्डेमुक्त करण्याच्या उद्देशाने सर्व कामे तातडीने पूर्ण करून त्याचा अहवाल सादर करण्याचा निर्देश आजच्या बैठकीत दिला.