नागपूरमध्ये होणार सौर उत्पादनांची निर्मिती
राज्य सरकारचा ‘ज्युपिटर’शी करार

सकाळ वृत्तसेवा
मुंबई, ता. २२ : नागपूरच्या बुटीबोरी येथे सौर उत्पादनांचा अत्याधुनिक कारखाना उभा राहणार आहे. त्यासाठी ज्युपिटर इंटरनॅशनल ही कंपनीने तब्बल १० हजार ९०० कोटी रुपयांची गुंतवणूक करणार असून त्याबाबत ज्युपिटर आणि राज्य सरकारमध्ये गुरुवारी (ता. २१) करार झाला. ज्युपिटर इंटरनॅशनल ही फोटोव्होल्टाइक सोलर सेलचे उत्पादन व सोलर एनर्जीची सोल्युशन्स या क्षेत्रातील भारतातील अग्रगण्य कंपनी आहे.
सध्या राज्य आणि केंद्र सरकारकडून सौरऊर्जा निर्मिती प्रकल्प उभारण्यावर भर दिला जात आहे. त्यामुळे सौरऊर्जा प्रकल्प उभारण्यासाठी आवश्यक असलेले सोलर वेफर उत्पादन, नवीन तंत्रज्ञानावर आधारित सोलर सेल्सची निर्मिती आणि सोलर मॉड्यूल उत्पादन अशा संपूर्ण मूल्य साखळीचा समावेश असेल. या प्रकल्पामुळे रोजगाराच्या ८,३००पेक्षा जास्त संधी निर्माण होणार आहेत. ‘तंत्रज्ञान, व्यापक प्रमाण आणि प्रादेशिक सक्षमीकरण यांच्या माध्यमातून भारतात अक्षय ऊर्जेचे भवितव्य निर्माण करण्यासाठी आम्ही कटिबद्ध आहोत. आमची गुंतवणूक या आमच्या दीर्घकालीन बांधिलकीचे प्रतीक आहे. महाराष्ट्र सरकारकडून मिळणाऱ्या सततच्या पाठिंब्याबद्दल आणि मार्गदर्शनाबद्दल आम्ही कृतज्ञ आहोत,’ असे ज्युपिटर इंटरनॅशनल लिमिटेडचे व्यवस्थापकीय संचालक अलोक गरोडिया यांनी सांगितले.