निदान केंद्र बंद, रुग्णालये रखडली!
बैठक घेण्याची आमदार सना मलिक यांची मागणी
सकाळ वृत्तसेवा
मुंबई, ता. १ : अणुशक्तीनगर विधानसभा मतदारसंघ आणि एम/पूर्व प्रभागातील आरोग्य विभाग, रुग्णालये व वैद्यकीय शिक्षणाशी संबंधित अनेक प्रकल्प वर्षानुवर्षे रखडले आहेत. बहुतांश झोपडपट्ट्यांचा भाग असलेल्या या परिसरातील गरजू लोकांची फरपट होत आहे. यासंदर्भात तातडीने बैठक घ्‍यावी, अशी मागणी आमदार सना मलिक यांनी केली आहे. त्‍यांनी याबाबत अतिरिक्त आयुक्त (पश्चिम उपनगरे) डॉ. बिपिन शर्मा यांना पत्र लिहिले आहे.
ओसवाल कम्पाउंड दफनभूमी व स्मशानभूमी प्रकल्प, शताब्दी वैद्यकीय महाविद्यालय सुरू करणे, लल्लूभाई कम्पाउंड रुग्णालय सुरू करणे, चित्ता कॅम्प येथे बाळासाहेब ठाकरे क्लिनिक, विष्णूनगर व वाशीनाका येथील प्रसूतिगृहे, महाराष्ट्रनगर व देवनार येथील मॅटर्निटी होममधील अपुऱ्या सुविधा, शहाजीनगर प्रसूतिगृहात विशेष नवजात शिशू काळजी विभाग सुरू करणे, शताब्दी रुग्णालयातील बंद असलेले निदान केंद्र पुन्हा सुरू करावे, अशा मागण्या करण्यात आल्‍या आहेत. प्रशासनाने बैठक घेऊन ठोस निर्णय घ्‍यावेत, अशी विनंती आमदार सना मलिक यांनी केली आहे.