कोकण विभागीय तृतीयपंथी हक्क व कल्याण मंडळाची स्थापना

सकाळ वृत्तसेवा
मुंबई, ता. १ : तृतीयपंथी समाजाचा सन्मान, हक्कांचे संरक्षण आणि समाजाच्या मुख्य प्रवाहात त्यांचा समावेश साधण्यासाठी कोकण विभागीय ट्रान्सजेंडर व्यक्ती हक्क व कल्याण मंडळ स्थापन करण्यात आले आहे. या मंडळात सोनाली चौकेकर यांची सह-अध्यक्षपदी, तर नीलोफर म्हस्के यांची सदस्यपदी निवड करण्यात आली आहे. या मंडळाच्या अध्यक्षपदी डॉ. विजय सूर्यवंशी (कोकण विभागीय आयुक्त महसूल विभाग) यांची नियुक्ती करण्यात आली आहे. तर मंडळाचे सदस्य सचिव म्हणून प्रादेशिक उप आयुक्त (सामाजिक न्याय) बाळासाहेब सोळंकी यांची निवड करण्यात आली आहे. सामाजिक न्याय व विशेष सहाय्य विभाग महाराष्ट्र शासनाने १३ डिसेंबर २०१८ रोजी जारी केलेल्या शासन निर्णयानुसार हे मंडळ कार्यरत राहणार असून, कार्यकाळ तीन वर्षांचा असेल. या मंडळाच्या माध्यमातून ट्रान्सजेंडर व्यक्तींना स्वतंत्र ओळखपत्रे वितरित करणे, शिष्यवृत्ती व शैक्षणिक सुविधा उपलब्ध करून देणे, कौशल्य विकास प्रशिक्षणाद्वारे रोजगाराच्या संधी निर्माण करणे, आरोग्य शिबिरे आयोजित करणे आणि आरोग्य सेवांमध्ये सुलभ प्रवेश उपलब्ध करून देणे यांसारख्या सुविधा दिल्या जाणार आहेत. तसेच बेघर ट्रान्सजेंडर व्यक्तींना निवास व्यवस्था, सामाजिक सुरक्षा योजनांचा लाभ तसेच तक्रारींचे निवारण करून न्याय मिळवून देण्याची जबाबदारीही मंडळ पार पाडणार आहे.