दसऱ्यानिमित्त शहरात कडेकोट बंदोबस्त
२० हजारांहून अधिक पोलिस मनुष्यबळ रस्त्यांवर

मुंबई, ता. १ : विजयादशमीचा उत्साह, देवींच्या मूर्तींचे विसर्जन आणि राजकीय पक्षांचे दसरा मेळावे, या पार्श्वभूमीवर कायदा व सुव्यवस्था अबाधित ठेवण्यासाठी मुंबई पोलिसांनी शहरात गुरुवारी (ता. २) कडेकोट बंदोबस्त ठेवला आहे. या वेळी शहरात २० हजारांहून अधिक पोलिस मनुष्यबळ मुंबईच्या रस्त्यांवर असेल. विसर्जन स्थळांसोबत, शिवाजी पार्क आणि बीकेसी येथील राजकीय मेळावा स्थळे, शहरातील संवेदनशील वस्त्यांवर अधिकचा बंदोबस्त नेमण्यात येईल, असे सांगण्यात आले. या बंदोबस्तासाठी सात अतिरिक्त आयुक्त, २६ उपायुक्त, ५२ सहायक पोलिस आयुक्त, २,८९० पोलिस अधिकारी आणि १६,५५२ पोलिस अंमलदार शहरभर तैनात करण्यात आले आहेत. तसेच महत्त्वाच्या ठिकाणी एसआरपीएफ प्लाटून, जलद प्रतिसाद पथक, दंगल नियंत्रण पथक, डेल्टा, कॉम्बॅक्ट आणि होमगार्ड यांचीही मदत घेतली जाणार आहे. नागरिकांना आवाहन करताना मुंबई पोलिसांनी सांगितले की, ‘गर्दीच्या ठिकाणी संयम बाळगावा, बेवारस वस्तू आढळल्यास त्वरित पोलिसांना कळवावे आणि नियमांचे पालन करून उत्सव जल्लोषात व सुरक्षिततेने साजरा करावा. आवश्यक प्रसंगी १०० किंवा ११२ या पोलिस हेल्पलाइनवर संपर्क साधावा.’