मुंबईत पावसाचा जोर ओसरला

मुंबई, ता. १ : बंगालच्या उपसागरात तयार झालेला कमी दाबाचा पट्टा गुजरातच्या दिशेने सरकल्यामुळे मुंबईतील पावसाचा जोर बुधवारी मोठ्या प्रमाणात ओसरला. सकाळपासूनच कडकडीत उन्हाने हजेरी लावल्याने दिवसभर उकाड्याचा त्रास जाणवला. संध्याकाळी सातच्या सुमारास मात्र सोसाट्याच्या वाऱ्यासह पावसाच्या सरी कोसळताच नागरिकांची तारांबळ उडाली.
अचानक कोसळलेल्या या पावसामुळे सायंकाळी ऑफिस सुटून घरी परतणाऱ्या मुंबईकरांना वाहतूक कोंडी आणि त्रासाला सामोरे जावे लागले. या सरी काही काळच आल्या, तरी जोरदार वाऱ्यामुळे त्यांची तीव्रता अधिक जाणवली. हवामान खात्याने मुंबईसाठी बुधवारी यलो अलर्ट जारी करीत मध्यम पावसाचा अंदाज व्यक्त केला होता. हा अंदाज उद्यापर्यंत कायम असून, मुंबईत मध्यम ते हलक्या सरी पडण्याची शक्यता हवामान खात्याने व्यक्त केली आहे.