गिरगावातील उपक्रमास पार्थ पवार यांची भेट

मुंबई, ता. २६ ः गिरगावातील ठाकूरद्वार येथील श्रीराम झावबा मंदिर परिसरात रामनवमीनिमित्त पसायदान चॅरिटेबल संस्थेच्या वतीने भाविकांना खिचडी व बिस्किट, पाण्याचे वाटप करण्यात आले. या उपक्रमाला पार्थ पवार, खासदार अरविंद सावंत यांनी आवर्जून भेट दिली. ट्रस्टच्या माध्यमातून दरवर्षी सामाजिक शैक्षणिक, कला, क्रीडा व सांस्कृतिक उपक्रम राबवले जात असल्याची माहिती अध्यक्ष मनोज आमरे यांनी दिली. लोकमान्य टिळक मार्ग पोलिस ठाण्यातील सहाय्यक पोलिस निरीक्षक काळे यांच्या हस्ते माउलींच्या मूर्तीस पुष्पहार अर्पण करून पाणपोई तसेच खिचडीवाटप सुरू करण्यात आले. पुणे जिल्हा रहिवासी सेवा संघाचे अध्यक्ष बाबासाहेब ठाकूर यांनीही या उपक्रमास भेट देऊन शुभेच्छा दिल्या. जिजाऊ संघटनेने याकामी मोलाची मदत केली.