कासा, ता. १३ (बातमीदार) : तालुक्यातील गाव खेड्यात बालविवाह, कुमारी माता, अंधश्रद्धा, व्यसन या गोष्टी सर्रास सुरू असतात. या सर्वांना आळा बसवण्यासाठी पालघर जिल्ह्यातील पोलिस दलामार्फत वेगवेगळ्या मार्गाने जनजागृती केली जात आहे. बालविवाह प्रथा रोखण्यासाठी उपाययोजना व जनजागृती करण्यासाठी कासा पोलिस ठाणे हद्दीतील पोलिस पाटील, सरपंच, ब्राह्मण, समाज मंडळाचे अध्यक्ष, लग्नपत्रिका छपाई करणारे तसेच त्या ठिकाणच्या महिला सदस्य यांची बैठक कासा येथील बिरसा मुंडा सभागृहात आयोजित केली होती.
कासा पोलिस ठाण्याचे श्रीकांत शिंदे यांनी बालविवाह केल्यास होणारे दुष्परिणाम याविषयी माहिती दिली. बालविवाह करणारा व या बालविवाहास उपस्थित राहणाऱ्यांवरसुद्धा गुन्हा दाखल केला जातो. त्यामुळे आपण गावातील प्रमुख नागरिक असून अशा घटना घडू नये यासाठी प्रयत्न केले पाहिजेत. यासाठी पथनाट्य, स्पर्धा, चित्रफित, प्रचार रॅली काढून जनजागृती करण्याचे आवाहन केले. या सभेत सभेत सहायक पोलिस अधिकारी संदीप नागरे, संदीप गावंडा, एस. चौधरी तसेच अनेक गावातील सरपंच, पोलिस पाटील, महिला सदस्य, भटजी, पत्रिका छपाई करणारे उपस्थित होते.