मुंबई, ता. १३ : आयआयटी मुंबईत बी.टेकच्या पहिल्या वर्षात शिकणाऱ्या विद्यार्थ्याने वसतिगृहाच्या सातव्या मजल्यावरून उडी मारून आत्महत्या केल्याची घटना उघडकीस आली. दर्शन सोलंकी (वय १८) असे मृत विद्यार्थ्याचे नाव असून या प्रकरणी पवई पोलिसांनी अपघाती मृत्यूची नोंद केली आहे. मूळचा अहमदाबाद येथील रहिवासी असलेला दर्शन हा आयआयटी मुंबईत मेकॅनिकल अभियांत्रिकीच्या पहिल्या वर्षात शिकत होता. तीन महिन्यांपूर्वीच तो आयआयटीत दाखल झाला होता. शनिवारी त्याची परिक्षा संपल्यानंतर रविवारी त्याने वसतिगृहाच्या सातव्या मजल्यावरून उडी मारून आत्महत्या केली. दरम्यान, या प्रकरणी कोणतीही सुसाईड नोट सापडली नसून पोलिसांनी अपघाती मृत्यूची नोंद केली आहे.