मुंबई, ता. २७ : चीन, पाकिस्तानमध्ये दहशतवादाचे प्रशिक्षण घेऊन संशयित दहशतवादी मुंबईत दाखल झाल्याची माहिती मुंबई पोलिसांना मिळाली आहे. त्यामुळे मुंबईवर पुन्हा एकदा दहशतवादी हल्ल्याचे सावट दिसत आहे. सरफराज मेमन असे संबंधित व्यक्तीचे नाव असून राष्ट्रीय तपास संस्थेने (एनआयए) याबाबत मुंबई पोलिसांना सावधानतेचा इशारा दिला आहे. त्यामुळे सुरक्षा यंत्रणा सतर्क झाली आहे.
मूळ मध्य प्रदेशचा रहिवासी असलेला सरफराज मेमनने चीन, हाँगकाँग, पाकिस्तानमध्ये प्रशिक्षण घेतले आहे. एनआयएनने मुंबई पोलिसांना याबाबत पाठवलेल्या ई-मेलमध्ये सरफराजचे आधार कार्ड, चालक परवाना तसेच पासपोर्टबाबत माहिती पाठवली आहे. तसेच मुंबई पोलिसांनी याप्रकरणी इंदूर पोलिसांशीही संपर्क साधला आहे. या संशयित व्यक्तीचा शोध सुरू असून सुरक्षा यंत्रणा सतर्क झाली आहे.