कासा, ता. ८ (बातमीदार) : वाडा तालुक्यातील रंजना ठानगे (वय ५६) ही महिला धुंदलवाडी येथील वेदांत हॉस्पिटलमध्ये उपचार घेत असून त्यांना एबी पॉझिटीव्ह रक्ताची नितांत गरज भासत होती. हे रक्त त्यांना इतरत्र कुठेही उपलब्ध होत नव्हते. रक्त उपलब्ध होण्यासाठी त्यांनी सोशल मीडियाचा आधार घेत रक्त मिळावे म्हणून मेसेज शेअर केला होता. हा मेसेज यारी दोस्ती ग्रुप या व्हॉटसअप ग्रुपवर पाठवण्यात आला. हा मेसेज पाहून यारी दोस्ती ग्रुपचे सदस्य म्हसाड येथील रोहिदास मातेरा यांनी तत्परता दाखवत निःस्वार्थ भावनेने रक्तदान केले. या रक्तदानाबद्दल रुग्णाच्या नातेवाईकांनी यारी दोस्ती ग्रुपचे व रक्तदाते मातेरा यांचे आभार मानले.