Pakistan: सौदीच्या प्रिन्सने पाकिस्तानला पाठवली ५० लोकांची खास टीम, शाहबाज सरकारसोबत नेमकं मिशन काय?

पाकिस्तानची अर्थव्यवस्था डबघाईला आली आहे. देश चालवण्यासाठी त्यांच्याकडे पैसा नाही. शाहबाज शरीफ दुसऱ्यांदा देशाचे वझीर-ए-आझम झाले पण देशाची स्थिती जैसे थेच आहे. दरम्यान सौदी अरेबिया पाकिस्तानच्या मदतीला धावून आला आहे. सौदीच्या क्राउन प्रिन्सने ५० खास लोकांची टीम पाकिस्तानला पाठवली. शाहबाज सरकारच्या सहकार्याने कोणतं मिशन तयार केले जात आहे?, असा प्रश्न आंतरराष्ट्रीय स्तरावर निर्माण केल्या जात होता.

सौदी अरेबिया पाकिस्तानवर दया दाखवत आहे. गुंतवणुकीची क्षमता पाहून सौदीला पाकिस्तानात मोठा गुंतवणूक करायची आहे. सौदी शिष्टमंडळाच्या या भेटीपासून पाकिस्तानला पूर्ण आशा आहेत. सौदी येथे गुंतवणूक करेल असे त्याला वाटते.

सौदी अरेबियाने पाकिस्तानात पाठवलेली ५० लोकांची टिम तेथील व्यापार आणि गुंतवणुकीच्या शक्यता तपासणार आहे. नंतर याचा अहवाल क्राउन प्रिन्सला देण्यात येणार आहे. सौदी अरेबियाचे उप गुंतवणूक मंत्री इब्राहिम अलमुबारक हे पाकिस्तानमध्ये गेलेल्या शिष्टमंडळाचे नेतृत्व करत आहेत.

पाकिस्तानचे वाणिज्य मंत्री जाम कमाल खान आणि पेट्रोलियम मंत्री मुसादिक मसूद मलिक यांनी सौदी शिष्टमंडळाचे स्वागत केले. ५० सदस्यीय शिष्टमंडळात ३० कंपन्यांच्या प्रतिनिधींचा समावेश आहे. ५० सदस्यांचे हे शिष्टमंडळ रविवारी इस्लामाबादला पोहोचले. दोन्ही देशांमधील गुंतवणूक परिषद आजपासून (सोमवार) सुरू होणार आहे. यामध्ये दोन्ही देशातील कंपन्यांचे अधिकारी सहभागी होणार आहेत. दोन्ही देशांमध्ये व्यापार आणि गुंतवणुकीला चालना देणे हा गुंतवणूक परिषदेचा उद्देश आहे.

सौदी अरेबियाचे उप गुंतवणूक मंत्री इब्राहिम अलमुबारक यांनी सांगितले, शिष्टमंडळात सौदी कंपन्यांच्या विविध क्षेत्रातील प्रतिनिधींचा समावेश आहे. यामध्ये माहिती तंत्रज्ञान, दूरसंचार, ऊर्जा, विमान वाहतूक, बांधकाम, खाण उत्खनन, कृषी आणि मानव संसाधन विकास या क्षेत्रांचा समावेश आहे.