मुंबई, ता. ११ ः मुंबई महापालिकेच्या आर/मध्य विभागात बोरिवलीस्थित श्रीकृष्ण नगरात पश्चिम द्रुतगती महामार्गाला लागून दहिसर नदीवर पुनर्बांधणी होत असलेल्या वाहतूक पुलाचा पहिला टप्पा राज्याचे मुख्यमंत्री एकनाथ शिंदे यांच्या हस्ते खुला करण्यात आला.
हा पूल पश्चिम द्रुतगती महामार्ग व श्रीकृष्णनगर, नागरी प्रशिक्षण संस्था व संशोधन केंद्र, अभिनवनगर, शांतिवन या भागाला जोडणारा आहे. या परिसरातील नागरिकांना येण्या-जाण्यासाठी हा एकमेव महत्त्वाचा पूल आहे. पुलाचा पहिला टप्पा ११ मीटर रुंदीचा आहे. वन विभागाचे ना-हरकत प्रमाणपत्र प्राप्त होताच दुसऱ्या टप्प्यात उर्वरित ११.३० मीटर रुंदीच्या पुलाचे काम पूर्ण करण्यात येणार आहे. स्थानिक खासदार गोपाळ शेट्टी, स्थानिक आमदार प्रकाश सुर्वे, आमदार प्रवीण दरेकर, आमदार मनीषा चौधरी, महापालिकेचे अतिरिक्त आयुक्त (प्रकल्प) पी. वेलरासू आणि इतर मान्यवर या सोहळ्यास उपस्थित होते.