कल्याण, ता. १२ (बातमीदार) ः कल्याण डोंबिवली महापालिका परिवहन मजदूर युनियनच्या वतीने १६ मार्च रोजी मोर्चाचे आयोजन करण्यात आले आहे. परिवहन कार्यालयावर हा मोर्चा काढण्यात येणार असल्याची माहिती युनियनचे अध्यक्ष प्रफुल्ल म्हात्रे यांनी दिली. नादुरुस्त बस वापरण्याचा दबाव केडीएमटी प्रशासन कर्मचाऱ्यांवर टाकत असल्याचा आरोप संघटनेच्या वतीने करण्यात आला आहे.
केडीएमटीच्या ताफ्यात नादुरुस्त बसची संख्या वाढली आहे. या बस दुरुस्त करण्यात याव्यात, या मागणीसाठी प्रशासनाला वारंवार पत्र पाठवण्यात आले आहे, परंतु प्रशासनाकडून याकडे दर्लक्ष करण्यात आले, असा आरोप संघटनेच्या वतीने करण्यात आला आहे. या नादुरुस्त बसमुळे कर्मचारी आणि प्रवासी दोन्हींच्या जीवाला धोका होऊ शकतो, पण अशा बस वापरात आणण्यासाठी प्रशासन कर्मचाऱ्यांवर दबाव टाकत आहे. याविरोधात मोर्चा काढण्याचा निर्णय घेतल्याचे संघटनेच्या पदाधिकाऱ्यांनी सांगितले. १६ मार्च रोजी सकाळी ११.३० वाजता केडीएमटी गणेश घाट डेपो ते कल्याण आरटीओ कार्यालयावर हा मोर्चा काढण्यात येणार आहे.