डहाणू, ता. २७ (बातमीदार) : डहाणू नगर परिषदेवर प्रशासकाची नियुक्ती होताच बेकायदा बांधकामाविरोधात नगर परिषदेने कारवाई सुरू केली होती. शिवाजीनगर येथील आठ ते दहा घरे, तसेच पारनाका येथील अतिक्रमणे तोडण्यात आली. तसेच डहाणू शहरातील ३०० कुटुंबांना घरे तोडण्याच्या नोटिसा बजावण्यात आल्या आहेत. ही मोहीम त्वरित थांबवण्यात यावी, या मागणीसाठी माजी नगराध्यक्ष भरतसिंग राजपूत यांच्या नेतृत्वाखाली भाजपच्या शेकडो कार्यकर्त्यांनी आज (ता. २७) नगर परिषद कार्यालयावर मोर्चा काढला. मोर्चातील शिष्टमंडळाच्या वतीने प्रशासक तथा मुख्याधिकारी वैभव आवारे यांना निवेदन सादर करण्यात आले. नगर परिषदेने चालू केलेल्या कारवाईला स्थगिती देण्याचे आश्वासन आवारे यांनी दिले.