नवी मुंबई, ता. ३१ (वार्ताहर) : उरण रस्त्यालगत सिडकोच्या मोकळ्या जागेत राडारोडा टाकणारे १० डम्पर शुक्रवारी (ता. ३१) पहाटे जप्त करण्यात आले आहेत. परिमंडळ १ चे पोलिस उपायुक्तांच्या अधिपत्याखालील पथकाने केलेल्या कारवाईत पोलिसांनी १० डम्परचालकांना ताब्यात घेतले. या डम्पर चालकांविरोधात एनआरआय पोलिस ठाण्यात गुन्हा दाखल करण्यात आल्याची माहिती पोलिस उपआयुक्त विवेक पानसरे यांनी दिली.

उलवे भागातील वहाळ येथील साई मंदिरासमोरील रस्त्याच्या बाजूला असलेल्या सिडकोच्या जागेत काही व्यक्ती रेबीट, माती आणि दगड टाकत असल्याची माहिती मिळाली होती. या माहितीच्या आधारे पोलिस पथकाने शुक्रवारी पहाटे प्रत्यक्ष जागेवर जाऊन शहानिशा केली असता, १० डम्परमधून राडारोडा टाकण्यात येत असल्याचे निदर्शनास आले. त्यामुळे पोलिसांनी डेब्रिजने भरलेले १० डम्पर आणि चालकांना ताब्यात घेतले. त्यांच्याविरोधात एनआरआय पोलिस ठाण्यात गुन्हा दाखल करण्यात आला. सदरची कारवाई एनआरआय पोलिस ठाण्याचे वरिष्ठ निरीक्षक प्रमोद तोरडमल यांच्या मार्गदर्शनाखाली पोलिस उपनिरीक्षक राहुल गरड आणि त्यांच्या पथकाने केली.

उरणमध्ये मुंबईतील डेब्रिज
मुंबईतील राडारोडा उरण रस्त्यालगत आणून डम्परचालक टाकत असल्याचे चौकशीत आढळून आले. डम्पर चालकांना मुबारक, शकील, माऊली, अमित खारकर, विकी दापोलकर यांनी राडारोडा उरण रस्त्यालगत वहाळ, जांभूळपाडा व इतर मोकळ्या जागेत टाकण्यासाठी सांगितल्याचे तपासात आढळून आले. त्यानुसार पोलिसांनी त्यांची धरपकड सुरू केली.