कोपरखैरणे, ता. २२ (बातमीदार) ः फेरीवाल्यांनी कोपरखैरणे रेल्वेस्थानक आणि मुख्य प्रवेशद्वाराजवळ बस्तान बसवले आहे. रेल्वे सुरक्षा विभाग आणि पोलिसांच्या कारवाईनंतर काही दिवसांनी पुन्हा ते तिथे परततात. यासाठी वेळोवेळी आंदलन करूनही प्रशासन लक्ष देत नाही, अशी तक्रार प्रवासी संघटनेने केली आहे. स्थानक परिसरातील फेरीवाल्यांचे हे अतिक्रमण थांबवण्याची मागणी त्यांच्याकडून करण्यात आली आहे.

पालिका व रेल्वे विभाग वेळोवेळी फेरीवाल्यांवर कारवाई करतात. तरीही पुन्हा पुन्हा फेरीवाले का परततात. यावर ठोस उपाययोजना का होत नाही, असा सवाल सुरेश शिंदे या प्रवाशाने केला आहे; तर सुनीता जगताप म्हणाल्या, की भिकारी, गर्दुल्ले हे महिला प्रवाशांची सुरक्षा धोक्यात आणत असताना याप्रकरणी कायमस्वरूपी उपाय का होत नाहीत? राजकीय पक्षांच्या महिला नेत्या याकडे लक्ष देत नाहीत. स्टेशनबाहेर व स्टेशनमधील स्थिती सारखीच आहे. बाहेर यांच्यामुळे वाहतूक कोंडी होते, तर आतमध्ये बसायला असणाऱ्या बाकड्यांवरही यांनीच अतिक्रमण केले आहे. याप्रकरणी गांभीर्याने लक्ष देत प्रवाशांना न्याय द्यावा, अशी मागणी प्रवासी करत आहेत.