वाडा, ता. १६ (बातमीदार) : तालुक्यातील कापरी येथील २२ वर्षीय तरुणीचा मृतदेह जंगलात एका झाडाला लटकत असताना सोमवारी (ता. १५) निदर्शनास आले. तिच्यावर अत्याचार करून हत्या केल्याचा संशय व्यक्त केला जात आहे. या प्रकरणाची सखोल चौकशी करण्याची मागणी आदिवासी मुक्ती मोर्चा सामाजिक संघटनेचे अध्यक्ष अनंता वनगा यांनी पोलिस निरीक्षकांकडे पत्राद्वारे केली आहे.

तालुक्यातील कापरी गावात दर्शना धोडी (वय २२) ही तरुणी कुटुंबासह राहत होती. ती आईसह नजीकच्या फॉर्म हाऊसवर कामाला जात होती, पण ९ मे रोजी ती कामावरून घरी परतलीच नाही. तिची शोधाशोध केली असता ती सापडली नाही. अखेर सोमवारी जंगलात एका झाडाला तिचा मृतदेह लटकत असताना नागरिकांच्या निदर्शनास आला. त्यानंतर तिचा मृतदेह शवविच्छेदनासाठी मुंबई येथील जे. जे. रुग्णालयात पाठवण्यात आला. तिच्यावर अत्याचार करून हत्या केल्याचा संशय नागरिकांनी व्यक्त केला आहे.