वाडा (बातमीदार) : तालुक्यातील गुंज गावाच्या परिसरात अनेक दगडखाणी आहेत. त्यामधून निघणारी माती दगडधोंडे हे शेतकऱ्यांच्या भातशेतीत जाऊन शेतीचे नुकसान होत आहे. या प्रकरणी प्रशासनाने दखल घेऊन नुकसानभरपाई देण्याची मागणी रंजना हरड या महिलेने जिल्हाधिकाऱ्यांकडे केली आहे. तालुक्यातील गुंज गावातील दगडखाणीलगतच रंजना हरड यांची शेतजमीन आहे. या शेतजमिनीत दगडखाणीमधील माती, दगडधोंडे जात आहे. त्यामुळे संपूर्ण शेती नापीक झाली असल्याची तक्रार करण्यात आली आहे. भातशेती नापिक झाल्याने त्याची प्रशासनाकडून नुकसानभरपाई मिळावी, अशी मागणी निवेदनात केली आहे. वाड्याचे तहसीलदार भाऊसाहेब अंधारे यांच्याशी संपर्क साधला असता, या तक्रारीची चौकशी करून योग्य ती कारवाई करण्यात येईल, अशी माहिती त्यांनी दिली.