किन्हवली, ता. २४ (बातमीदार) : अडीच महिन्यांपूर्वी झालेल्या वादळाने सोगाव अंगणवाडीचे छप्पर उडाले होते; मात्र त्याची डागडुजी न झाल्याने पावसाळ्याच्या दिवसांत गळक्या छपराखाली बसून लहान मुलांना मुळाक्षरे गिरवण्याची वेळ आली आहे. छप्पर दुरुस्तीसाठी अंगणवाडी सेविका, मदतनीस, पालक व ग्रामस्थांनी स्थानिक ग्रामपंचायतीकडे पत्रव्यवहार केला आहे; मात्र अंगणवाडीच्या छताची दुरुस्ती होत नसल्याने ग्रामस्थांनी संताप व्यक्त केला आहे, तसेच गळणाऱ्या पाण्यामुळे बालकांना आजार होण्याची शक्यता निर्माण झाली आहे.
शहापूर तालुक्यातील सोगाव जिल्हा परिषद गटातील मौजे सोगाव येथील अंगणवाडीच्या एका बाजूचे पत्र्याचे छत १५ एप्रिलच्या रात्री झालेल्या वादळाने उडाले. या घटनेला अडीच महिने होऊनही छताची दुरुस्ती न झाल्याने बालकांना जीव मुठीत धरून शिक्षणाचे धडे घ्यावे लागत आहेत. छपरातून गळणाऱ्या पावसाच्या पाण्यामुळे मुले भिजून आजारी पडण्याची शक्यता निर्माण झाली आहे. वर्गखोलीत पाणीच पाणी साचल्यावर मुलांना व्हरांड्यात एका कोपऱ्यात दाटीवाटीने बसावे लागते.
स्थानिक ग्रामपंचायतीने अंगणवाडीच्या छताची दुरुस्ती करावी, यासाठी अंगणवाडी सेविका, मदतनीस, पालक व ग्रामस्थांनी अर्ज, विनंत्या करूनही दखल न घेतल्याने मुलांच्या बसण्याची तात्पुरती व्यवस्था जुन्या ग्रामपंचायत कार्यालयात करावी.
- बेबी भुरबूडा, अंगणवाडी सेविका

सध्याची अंगणवाडी इमारत जुनी असून ती तोडून त्या ठिकाणी नवी आरसीसी इमारत बांधण्याचा प्रस्ताव तयार केला आहे, परंतु पंचायत समितीकडून निर्लेखन दाखला मिळत नसल्याने उशीर होत आहे.
- सुनील पवार, सोगाव ग्रामपंचायत