महिलेने दिला तीन बाळांना जन्म
सकाळ वृत्तसेवा
ठाणे, ता. १७ : ठाणे जिल्हा सामान्य रुग्णालयात एका महिलेने तीन बाळांना जन्म दिला. दीड महिन्यांच्या उपचारानंतर आई आणि तीन बाळ सुखरूप आहेत.
जिल्हा सामान्य रुग्णालयात शहरी, ग्रामीण आणि दुर्गम आदिवासी भागातील रुग्ण उपचारासाठी येत आहेत. रुग्णालयातील प्रसूतिगृह अयद्यावत असून प्रसूतीसाठी जिल्ह्याच्या कानाकोपऱ्यातून महिला उपचारासाठी येत आहेत. प्रसूतिगृहात भिवंडीमध्ये राहणाऱ्या नाझमिन (३१) यांनी ४ सप्टेंबरला तीन बाळांना जन्म दिला आहे. तीनही अपत्यांची प्रकृती चांगली आहे. विशेष म्हणजे तीन बाळांसह त्यांच्या आईची प्रकृती चांगली आहे. दीड महिन्यांत बाळांचे वजन वाढले असून योग्य उपचारानंतर त्यांना गुरुवारी (ता. १७) घरी पाठवण्यात आले. प्रसूतीच्यावेळी बालरोगतज्ज्ञ डॉ. सुरेश वानखेडे, स्त्रीरोगतज्ज्ञ डॉ. श्रेया शेळके, भूलतज्ज्ञ डॉ. प्रियांका महांगडे याबरोबर डॉ. शैलेश गोपनपल्लीकर, डॉ. राहुल गुरव, एसएनसीयू परिचारिका सारिका शेणेकर आणि कर्मचाऱ्यांनी अथक परिश्रम घेतले. सोनोग्राफी रिपोर्टनुसार नाझमिन पोटात तीन अर्भक असल्याचे कळले. यानंतर नाझमिन हिने डॉक्टरांनी दिलेल्या सूचना व पथ्य पाळून वेळोवेळी तपासणी केली. प्रसूतीत तिने एका पाठोपाठ तीन बाळांना जन्म दिला होता. दीड महिन्यांच्या उपचारानंतर आई व तीनही बाळ सुखरूप आहेत.