रसायनीत कडधान्यांच्या पेरणीला सुरुवात
रसायनी, ता. १९ (बातमीदार) : रसायनी परिसरात यंदाच्या खरिपाच्‍या हंगामानंतर शेतकऱ्यांनी दुबार कडधान्यांच्या पेरणीला सुरुवात केली आहे. परिसरात अनुकूल वातावरण तयार झाल्यामुळे कडधान्यांच्या पेरणीच्या कामांनी जोर धरला आहे. दिवसा कोरडे व रात्री थंडी असल्याने हे वातावरण रोपांच्या वाढीकरिता उत्तम असल्याचे शेतकऱ्यांकडून सांगण्यात येत आहे.
परिसरातील वडगाव, चावणे, आपटे, मोहोपाडा पंचक्रोशीतील शेतकरी खरिपाच्या हंगामानंतर दुबार कडधान्यांचे पीक घेतात. यामध्ये वाल, चवळी, हरभरा, मूग, मटकी आदी प्रकारच्या कडधान्यांचे पीक घेतले जाते. यात वालाच्या पिकाचे प्रमाण सर्वाधिक असते. तसेच, सिंचनाचा आधार असलेले शेतकरी भात आणि भाजीपाल्याचे पीक घेतात. खरिपाच्या हंगामातील पिकाच्या कापणीनंतर शेतात पेरणीसाठी अनुकूल वातावरण तयार झाल्यावर शेतकऱ्यांनी दहा-बारा दिवसांपासून कडधान्यांच्या पेरणीची कामे सुरू केली आहेत. दरम्यान, मागील आठवड्यात तीन-चार दिवस हवामानात बदल झाला होता. आकाश ढगाळलेले होते, तर तापमानात वाढ झाली होती; मात्र या खराब हवामानाचा रोपांवर फारसा परिणाम होणार नाही, असे शेतकरी हरी गडगे यांनी सांगितले आहे. परिसरात नुकतीच भातकापणी झाल्यामुळे कडधान्य पेरण्या केल्या आहेत, असे शेतकरीवर्गाकडून सांगण्यात येत आहे. काहींच्या शेतात बियाणे उगवले असून रोपे दिसू लागली आहेत. तसेच, दुबार कडधान्य पेरणीच्या शेतात टोचे मारून बियाणे टाकणे, शेतात बियाणे फेकणे, तसेच त्‍यानंतर नांगरणी करणे आदी कामे सुरू असल्याचे कृषिमित्र सुदाम कडपे यांनी सांगितले. यंदा कडधान्यांचे पीक चांगले येईल, अशी आशा व्‍यक्‍त करण्यात येत आहे.