अंबरनाथमध्ये कंपनीला भीषण आग
अंबरनाथ, ता. २४ (बातमीदार) : आनंदनगर औद्योगिक वसाहतीमधील रसिनो फार्मा या रासायनिक कंपनीला रविवारी (ता. २४) रात्री साडेनऊ वाजण्याच्या सुमारास आग लागली. या आगीने क्षणातच उग्र रूप धारण केल्याने आगीचे व धुराचे लोट परिसरात पसरले. या घटनेची माहिती मिळताच एमआयडीसी आणि अंबरनाथ नगरपालिका अग्निशमन दलाने घटनास्थळी धाव घेत आग आटोक्यात आणण्यासाठी शर्थीचे प्रयत्न केले. रात्री उशिरा या भीषण आगीवर नियंत्रण मिळवण्यात अग्निशमन दलाला यश आले. या आगीत कोणतीही जीवितहानी झाली नसल्याची माहिती प्रशासनाने दिली.