भिवंडी ता.२६ (बातमीदार): माहेरहून हुंडा आणावा, यासाठी सासरच्यांकडून छळ होत असल्याच्या दोन घटना शहरातील वेगवेगळ्या पोलिस ठाण्यात नोंदवण्यात आल्या आहेत. या प्रकरणी पोलिसांनी सासरच्या मंडळींवर गुन्हा दाखल केला आहे.
शांतीनगर पोलिस ठाणे हद्दीतील हसीनाबानो अन्सारीचा (२२) विवाह शांतीनगर परिसरातील पिराणी पाडा मेहबूब नगर मधील अतीकुर रेहमान सुफीयान अहमद अन्सारीशी झाला होता. पतीसह सासरच्या मंडळीने माहेरहून हुंडा म्हणून ५० हजार रुपये आणावेत, यासाठी तिला शारीरिक, मानसिक छळ दिला होता. या प्रकरणी पीडितेने शांतिनगर पोलिस ठाण्यात तक्रार दाखल केली होती. त्यानुसार, पोलिसांनी २५ एप्रिल रोजी पतीसह सासरची मंडळी विरोधात गुन्हा दाखल केला आहे. तर दुसऱ्या घटनेत कोनगाव पोलिस ठाणे हद्दीतील जागृती सोष्टे (२७) यांनी सासरच्या मंडळींनी शारीरिक, मानसिक त्रास दिल्याची तक्रार दिली आहे. याप्रकरणी २६ एप्रिल गुन्हा दाखल करण्यात आला आहे.