सकाळ वृत्तसेवा
ठाणे, ता. ७ : ठाणे महापालिका कार्यक्षेत्रात २ ते ६ मे या कालावधीत कॅन्सर डायग्नोस्ट‍िक व्हॅनमार्फत झोपडपट्टी विभागात राहणाऱ्या नागरिकांची मुख कर्करोग, स्तन कर्करोग व गर्भाशय मुख कर्करोग तपासणी करण्यात आली. या वेळी ३० वर्षांवरील महिला व पुरुषांमध्ये ३२० जणांनी मुख कर्करोग, १८६ जणांनी स्तन तपासणी, १८३ जणांनी गर्भाशय मुख कर्करोग अशा ६८९ नागरिकांनी या सुविधेचा लाभ घेतला.
जागतिक कर्करोगदिनाचे औचित्य साधून आरोग्यमंत्री प्रकाश आबिटकर यांनी कॅन्सर डायग्नॉस्टिक व्हॅनचे उ‌द्घाटन मुंबईत केले होते. ही व्हॅन संपूर्ण महाराष्ट्रभर फिरणार असून, २ ते ६ मे या कालावधीत ठाणे महापालिका कार्यक्षेत्रात तपासणी दौरा करण्यात आला. रोझा गार्डनिया, नागरी प्राथमिक आरोग्य केंद्रात २ मे रोजी व्हॅनचे उद्घाटन जिल्हा शल्यचिकित्सक डॉ. कैलास पवार यांच्या हस्ते, उपआयुक्त (आरोग्य), ठाणे महापालिका उमेश बिरारी, वैद्यकीय आरोग्य अधिकारी डॉ. चेतना नितिल के. व माता व बाल संगोपन अधिकारी डॉ. वर्षा हेमंत ससाणे यांच्या उपस्थितीत झाले. या वेळी व्हॅनमार्फत तपासणी करण्यात आलेल्या महिलांपैकी १३१ महिलांची तपासणी करण्यात आली. त्यातील संशयित रुग्णांना पुढील उपचारांसाठी रुग्णालयात पाठवल्याचे माता बालसंगोपन अधिकारी डॉ. वर्षा ससाणे यांनी सांगितले.
--------------------------------------------------------
उपकरणांनी सुसज्ज मोबाईल व्हॅन
कर्करोगाची तपासणी करण्यासाठी आवश्यक असलेल्या उपकरणांनी सुसज्ज अशी मोबाईल व्हॅन आहे. यामध्ये मुख कर्करोगाच्या तपासणीसाठी डेंटल चेअर व बायोप्सी घेण्यासाठीची आवश्यक उपकरणे तसेच गर्भाशय मुख कर्करोगाच्या तपासणी, स्तन कर्करोग बायोप्सीसाठी असलेले उपकरणे उपलब्ध आहेत. उच्च तपासणीसाठी रुग्णालयांपर्यंत पोहोचू शकत नसलेल्या झोपडपट्टीतील नागरिकांसाठी ही व्हॅन उपयुक्त ठरत आहे.